Теңге бағамының өзгеруі ұлттық экономикаға қолайлы әсер етпек

Еліміздегі теңге бағасы­ның Ұлттық банктің ше­ші­мімен күрт өзгеруіне қатысты көрші елдердегі сарапшылар да өз пікірлерін білдіру үстінде  «Қазақстанда елдің Ұлттық банкінің жариялауымен теңге бағамын түзету жүзеге асты, – деп мәлімдеді «Қырғызстан Қаз­ком­мерцбанк» ААҚ қазына­шы­лы­ғының басшысы Айбек Қара­мұратов. – Егер біз соңғы кездері Ресей рублі мен қырғыз сомының долларға қатысты күрт құлдырай бастауын байқасақ, осы уақыттар аралығында теңгенің долларға қа­тысты бағамы 155-160 теңге көле­мінде неғұрлым тұрақтылықты сақтап келген болатын. Менің ойымша, енді Қазақстан Ұлттық бан­кі де өзінің көршілеріндегі орын алған жағдайға қатысты Қа­зақ­стан теңгесінің шынайы курсын нақтылау ісіне кірісіп отыр». Сарапшы осыған байланысты Қазақстанда бірінші күні едәуір дәрежеде абыржушылықтың етек алғандығын айтады. Осы жағдайға байланысты 1 доллардың құны 200 теңгеден астам мөлшерге дейін шарықтап кетіп отыр. Ал кей­бір банктер қосымша шаралар қабыл­данғанға дейін  конвертация­лауды тоқтатқан. «Менің ойымша, рыноктағы бұл абыржушылық аптаның ая­ғы­на дейін басылып, теңге баға­мы тұ­рақтанатын болады. Ол 1 долларға 190 теңгеден аспауы мүмкін», – дей­ді сарапшы. Осыған байланысты Айбек Қа­ра­мұратов қырғыз кәсіпкерлерін мә­селенің артын күте тұруға ша­қыр­ған. Ол бір-екі күннің өзінде жағ­дай неғұрлым анықтала түсетін бо­лады деп есептейді. Freedom Finance инвестициялық компаниясының корпоративтік клиенттермен жұмыс жөніндегі бас­қарма  төрағасы Сәкен Үсердің болжамынша, Қазақстан Ұлттық бан­кінің бұл шарасы қазақстандық шикізат компаниялары үшін қо­лай­лы әсер етпек. «Егер мұндай компаниялар­да шикізат сату доллармен жү­зе­ге асырылатындығын есепке ала­тын болсақ, олардың келесі тоқ­сан­дық есептері бойынша табатын табыс көлемі қазіргіден едәуір ар­та түсетіндігін болжауға бола­ды. Бұл әсіресе, «Қазақмыс», «Қаз­МұнайГаз» Барлау Өндіру» АҚ секілді ірі компанияларға қа­тысты күтілетін жайт. Бүгінгі күні Лондон биржасында тіркелген барлық қазақстандық компаниялар 8-15 пайыз көлемінде өсім алатын болады», – деп мәлімдеді ол. Осыған байланысты сарапшы тұтынушыларға Лондон биржасында тіркелген қазақстандық компаниялардың долларлық акцияларын сатып алу жөнінде кеңес берген. Оның айтуынша, кешегі күннің өзінде қазақстандық қор биржасындағы осындай компаниялардың акцияларының бағасы 8-22 пайыз аралығында өсе түскен. «Теңге бағамына өзгеріс­тер оның осы уақытқа дейін қалыптасқан бағамын тұ­рақты ұстап тұру қиындық тудыр­ғандықтан жүзеге асты деп есеп­теймін. Теңге бойынша банкаралық ставка өте жоғары деңгейде болды. Бұл банк секторының кірістілігіне кері әсерін тигізді. Сондықтан ерте ме, кеш пе бұл ставканы өзгертуге бәрібір тура келетін еді», – дейді сарапшы. Оның айтуынша, Ұлттық банк­тің бұл қадамы жалпылай алғанда, Қазақстан экономикасына, оның ішінде шикізат экономикасына оң әсер етпек. Осы ретте сарапшы теңге бағамының жос­парлы түрде өзгеруіне рубльдің қазіргі жағдайда елеулі әсер еткен деп есептейді. «Дегенмен, бұл жерде рубльге қарағанда теңгенің реттеуге неғұрлым бейім екендігін айтуымыз керек. Егер  бұл мәселені Кеден одағы аясындағы интеграциялық үдерістерге қатысты қарастыратын болсақ, онда Ұлттық банктің бұл қадамын осы мәселеде неғұрлым орынды, аталған одақ аясында ұлт­тық экономиканы қорғауға ба­ғыт­талған шара ретінде атап көр­се­туіміз керек», – дейді Сәкен Үсер. Сұңғат ӘЛІПБАЙ, «Егемен Қазақстан».