Қоғам • 15 Қазан, 2021

Жұртқа жақын болудың тиімді жолы

88 рет көрсетілді

Түркістан облысында орнатылған бейнебақылау камераларының көмегімен жыл басынан бері 67 557 әкімшілік құқық бұзушылық пен 95 қылмыс анықталды. Ал облыс орталығы Түркістан қаласында бейнебақылау камераларының көмегімен 32 424 әкімшілік құқық бұзушылық және 30 қылмыс дер кезінде белгілі болды. Салыстырмалы түрде айтсақ, өткен жылдың осы мерзімімен салыстырғанда анықтау көрсеткіші артқан.

Азаматтар өтініш, арыз немесе жеке мәселесімен кез келген уақытта сервистік поли­ция қызметіне жүгініп, тиісті көмек ала алады. Демек қыл­мыс­тардың ашылуы мен тірке­луін­де стационарлық бекеттер іс жүзінде өз тиімділігін көрсе­тіп отыр. Облыс аумағында аза­мат­тардың қауіпсіздігін қам­та­­масыз ету және қоғамдық тәр­тіп­ті сақтау мақсатында адамдар көп шоғырланатын жерлерде Полиция департаментінің 13 стационарлық бекеті жұмыс істеп тұр. Оның ішінде қазіргі заманауи талапқа сай 6 стационарлық мо­дульдік пункт тәуліктеп қыз­мет көрсетеді. Аталған бекет­тер­дің барлығы заманауи техникамен, атап айтқанда портативті бейнетіркеуіштермен, радиостансалармен және планшеттермен жабдықталған. Тағы бір ерекшелігі стационарлық бекеттер сыртқы бейнебақылау камерасымен жабдықталып, жедел басқару орталығына қосыл­ған. Олар жол қауіпсіздігін қам­та­масыз ету, қоғамдық орын­дар­да, көшелерде қыл­мыстың ал­дын алу бойынша қызмет атқарады. Өңірдің тәр­тіп сақ­шы­лары полицияның сер­вис­тік болуын аса маңызды санайды. Сондықтан бұл бағыттағы жұмыс­тарды жалғастырып, жұрт­­­­­­­­қа ­жақын полиция қағидаты ая­­­сында­ қолға алынған маңызы бар жобаларды жүзеге асыруға ерек­­ше көңіл бөліп отыр.

Түркістан облысы Полиция департаментінің бастығы, полиция генерал-майоры Қайрат Дәлбеков халықаралық тә­жіри­беде сервистік полицияның тұ­жы­р­ымдамасы қабылданғанын айтады. Яғни сервистік полиция – полиция қызметіндегі қоғамдық бағдарланған тәсіл – басқару стилі, мәселені шешуге және қоғаммен серік­тес­тікке бағытталған ұйым­дас­ты­рушылық стратегия. Осы ст­ра­тегия шеңберінде полиция қоғаммен тығыз өзара іс-қимыл жасауға, полиция қыз­ме­тінің тиімділігі және нақты аумақта тұратын тұрғындардың қауіпсіздігі мәселелерінің басым­ды­лығы туралы халықтың пікірін ескере отырып, қауіпсіздік мәсе­лелерін бірлесіп шешуге бағыт­талған белсенді жұмыс моде­лі­не бағдарланады. Полиция мен қоғамға қылмысты ашуда, құқық қорғау және қауіп­сіз­дік мәселелерін шешуде ын­ты­мақ­тастықтың жаңа әдіс­терін қолдануға мүмкіндік бере­тін модель.

– Біздің құқық қорғау саласында реформа керектігі айтылып, қаншама маңызды жобалардың іске асырылып жатқаны жаңа­лықтар мен әлеуметтік желі­ден өздеріңізге жақсы таныс шы­ғар. Алайда кейбір желі қол­да­ну­шыларының өзі реформа деген­ді жіті түсінбей, полицияны толы­ғы­мен өзгертіп тастау керек деген пікірге ұштастырып жатады. Ал шын мәнінде реформа – ол сол қызметтің өркендеп өсуі мен дамуы үшін қажетті мән-маңызы мол ауқымды жобалар. Жобалар мамандардың идеясынан туындайды. Идея болса реформа жасалатын саланың жілігін шағып, майын ішкен маманның, жылдар бойы жинақтаған толымды тәжірибесі мен білім-біліктілігінің арқасында, саралай келе пайда болады. Егер осы сатылардан өтпеген идеялар туындап, жоба ретінде қолға алынса оның ғұмыры ұзақ болмайды. Тамыры тереңге бармай, дұрыс жемісін де жей алмайсыз. Сондықтан әлемдік тәжірибені есепке ала отырып, өз еліміздегі сол салаға байланысты мәселелерді қарап, саралап, тиянақты тұжырым арқылы жобалар іске асуы қажет. Бұл уақыттың да, заманның да талабы. Демек реформа жасау жолындағы бүгінгі таңда біздің ішкі істер саласының үлкен жобасы ол – сервистік полиция. Бірінші кезекте сервистік полиция ел Президенті Қасым-Жомарт Тоқаевтың «Жұртқа жақын полиция» қағидатын іске асыру мақсатында жасалып отыр. Яғни полицейлер ба­рынша халыққа жанашыр, көмекші және қамқор болуы үшін «Жұртқа жақын полиция» қағидаты Жолдауда айтылып, іске асырылуы нақтыланған болатын. Сондықтан Ішкі істер министрі Ерлан Тұрғымбаев Президенттің осы тапсырмасын республикамызда жүйелі түрде жүзеге асыру үшін тың жобаларды қолдауда. Міне, оның ішінде осы «сервистік полиция» бар, – дейді генерал-майор Қ.Дәлбеков.

Бүгінгі таңда сервистік полицияны киелі өңірде жүзеге асыру үшін бар мүмкіндік қолданылуда. Қарқынды даму жолындағы жаңа облысқа қоныс аударып, жұмысын жаңадан бастаған департамент штат санының толық болуы мен қаржының қажетті деңгейде бөлінуін маңызды санайды. Сондықтан мемлекеттің қолдауымен бұл мәселелерді тиімді шешу жолдары біртіндеп жүзеге асуда. Кадр мәселесіне де ерекше көңіл бөлінуде. Ондағы басшылық пен қызметкерлер жеке құрамның этиканы толық меңгеріп, білім мен біліктілігін арттыруы бағытында жұмыс істеуде. «Қызметкерлердің жем­қорлыққа бармауы, тосқауыл қою мен оның алдын алу, қо­ғам белсенділерімен және ха­лықпен байланыста болу, арыз-шағымдарды кейінге қалдырмау, министрлік тарапынан берілген тапсырманы толығымен іске асыру мықтап қолға алынған және біздің тараптан қадағаланып тұрады. Құрамында ардагерлер, БАҚ өкілдері және органнан тыс маман иелері бар консультативтік кеңесші орган құрылған. Өзі заң қызметкері бола тұра заңбұзушылыққа бар­ғандардың мәселесі мін­дет­ті түрде сол органның және тәр­тіптік комиссияның алдын­да қа­ралып, заңды шешім қабыл­да­­нады. Бар­ша­мызға ортақ заң бар, яғни сол заң аясында мейлі ол лауа­­­зым­ды адам немесе құқық қорғау органының қыз­меткері, басшысы болса да жауапкершілікке тартылады. Тиісті шара көріледі», дейді департамент бастығы.

Президенттің учаскелік по­лицейлердің мәртебесін арт­тыру мақсатындағы тапсыр­ма­сын орындау бойынша атқа­рылып жатқан жұмыстар да аз емес. Учаскелік полиция ха­лық­пен тікелей байланыс жасайтын құрылым болғандықтан олардың арыз-шағымды дер кезінде назарға алып, тірек пунк­тінде тиесілі жұмыстарды ат­қаруына, өзіне бекітілген аумақта қылмысты болдырмау, про­фи­лактикалық, қылмыстың ал­дын алу жолдарына ерекше мән берілуде. «Бірінші кезекте учаскелік инспекторлар өз аумағындағы күдікті, жә­бірленуші туралы мән-жайға қанық болуы тиіс. Сондай-ақ учаскелік полицейлердің тірек пункттерінің жанына олардың тұратын үйі жапсарлас салынып жатыр. Бұл да полицияның дамуы жолындағы маңызды өзгерістер. Өйткені учаскелік полицейге жұмыс уақыты аяқталған сәтте арыз-шағымы бар жәбірленуші келе қалса, ол қиналмастан жұмыс орнына кіріп, арызын қабылдап алады. Мәселесіне баса мән береді. Халықтың арыз-шағымы кезек күтпеуі тиіс. Тағы бір мән беретін қадам, Мемлекет басшысының Жолдауын жүзеге асыру мақса­тында, қаңтардан бастап аза­мат­тардың конституциялық құ­­қық­тарына әсер ететін негізгі шешімдерді прокурорлармен келісу туралы қылмыстық про­цес­тің «үш буынды моделі» енгі­зілді. Осыған орай біздің тер­геушілерге заманауи техникалар үлестірілді. Олар осы техникалар арқылы қылмыстық істі электронды түрде прокурорға келісуге жолдайды. Ал жолдаған істегі тергеушінің жазған жазбаларын жәбірленуші, адвокат пен күдікті сол мезетте электронды форматта танысып, тікелей көре алады. Бұл бағыттағы жұмыстар халыққа ашық әрі қолжетімді болу мен цифрлы технологияны қолдануға келіп саяды. Бастысы біз үшін Президент тапсырмасымен осындай ауқымды істерді орындап, сол арқылы халықтың полицияға деген сеніміне қол жеткізу. Қарапайым халықтың сенімінен шығып отырсақ, нағыз реформа сонда болмақ. Біздің бүгінгі таңдағы басты мәселеміз қылмысы аз облыста сервистік полицияны қарқынды түрде іске асыру», дейді Қайрат Дәлбеков.

Айта кетелік, сервистік полицияны толыққанды іске асыруды қадағалау мақсатында киелі өңірге жасаған іссапарында Ішкі істер министрі Е.Тұрғымбаев департаменттің жұртқа жақын болу бағытында іске асырған жұмыстарымен жіті танысып, оң бағалаған болатын.

Соңғы жаңалықтар

Ұқсас жаңалықтар