КЕШЕГІ НИКОЛАЙ – БҮГІНГІ НАЙМАНБАЙ
АТЫН ӨЗГЕРТІП, ЗАТЫН ЖӨНГЕ КЕЛТІРГЕНІМЕН ШЕНЕУНІКТЕР КЕДЕРГІСІНЕН АСА АЛМАЙ ЖҮР
1941-1945 жылдарғы Отан соғысында Еуропаны қанқұйлы фашистерден азат етуге қатысқан жас жігіттердің қатарында Найманбай Құрбанов Қызылорда облысы, Жаңақорған ауданы, Бірлік колхозынан соғысқа аттанған болатын. 1942 жылғы қазанның 1-10 күндері 335-ші атқыштар полкының жауынгері ретінде Сталинград маңындағы кескілескен шайқаста ауыр жараланды. Мина жарықшағынан бір аяқ, бір қолы сынды. Үш ай әскери госпитальда жатып, айыққан соң қаңтарда соғысқа қайта аттанды. Ұлы Жеңісті Германия іргесінде қарсы алды. Көптеген орден, медальдардың иегері соғыстан соң да халық шаруашылығын өркендетуге, “Бірлік” совхозындағы асыл тұқымды қаракөл қойын өсіруге аянбай кірісті. Әр жүз аналықтан 145-тен 165-ке дейін төл өргізген кезі болды. Төрт қыз, төрт ұл өсіріп жетілдірді. Найманбай Құрбановтың әскерден келгеннен кейінгі басты қиындығы – Сталинград түбіндегі шайқаста ауыр жарақаттанып, әскери госпитальда жатқан уақытында тілі Найманбайға келмеген әскери (писарь) хатшы оны Николай деп құжаттарын түгел сол атпен толтырып жіберген көрінеді. Елге келгеннен кейін барлығын басынан бастап, қайта құжаттандырып, Николайды Найманбайға өзгертуге қыруар уақытын жіберген екен. Сол кезде: “Сіз орыстың жері үшін соғыстыңыз, орыстың атын алыпсыз. Барлық атақты Ресейден сұраңыз!” деп тепсінген шенеуніктер де болыпты. Енді міне 87-ге келген шағында шенеуніктердің шексіз қақпақылына ұшырап отыр. Ұлы Жеңістің 60 жылдығына 1953 жылы тұрғызған үйінің орнына “жаңадан там салып беремін” деген аудан әкімі ауысып кеткен соң, одан бергі басшылар бірі-біріне сілтеп жүріп-ақ, жиі ауысып кетіп отырған. Бес жылда Жаңақорғанға әкімдік еткен Т. Мұстафаев, Н. Мұсабаев, Б. Бектібаев, Б. Қалтаев,Б. Еламановтардың бірде-біреуі оны орындай алмаймын демейді. Телефон автомат секілді. “Күте тұрыңыз” деп діңкесін құртып келеді. Ашынған ақсақал өткен жылы қарашада Елбасы өткізген тікелей эфирге де шағымын жолдапты. Одан келген жауап сатылап төмендей келе, қолында ешқандай құзыры да қаржысы да жоқ Бірлік ауылының әкімі Рақыш Мәметовтің қолына түсіпті. Содан дәрменсіздігіне өкінген әкім Рақыш пен сексеннің жетеуіндегі соғыс және еңбек ардагері, үшінші дәрежелі мүгедек Найманбай ақсақал екеуі қосыла жер шұқып отырып қалыпты. – Жылда Жеңіс мерекесіне дейін әкімдер мен шенеуніктер хабарласып отырады да қалай мереке өтті пышақ кескендей, сап тыйылады. Биыл да уәдені үйіп-төгіп беріп жатыр. Егер сөздерінде тұрмаса: “Сіз орыстың жері үшін соғыстыңыз, орыстың атын алыпсыз. Барлық атақты Ресейден сұраңыз!” деп тепсінген шенеуніктің айтқанымен Ресей Президенті Дмитрий Медведев пен Премьер-министрі Владимир Путинге хат жазғалы отырмын, – дейді қарт кемсеңдеп. Сонда әкім-қаралардың “Атаңа не қылсаң, алдыңа сол келеді” деген қарапайым қағиданы да білмегені ме деген сұрақ ойымызды онға, санамызды санға бөлді. Ескендір ЕРТАЙ. Қызылорда облысы, Жаңақорған ауданы, Бірлік ауылы. ЕЛІН СҮЙГЕН ЕР БОЛАР Астана қаласындағы №37 жалпы білім беретін орта мектепте оқумен қатар тәрбие жұмыстары да жақсы жолға қойылған. Елбасымыздың “Ғасырлар бойы қалыптасқан мәдени мұраға сүйеніп, ертеңгі және бүгінгі күннің мәдениетін дамыту керек” деген сөзін басшылыққа ала отырып, мектепте тәрбие “Мәдени мұра” мемлекеттік бағдарламасы бойынша жүргізіледі. Бұл бағдарламаның мақсаты—оқушылардың бойында туған жеріне, еліне деген сүйіспеншілік сезімдерін тәрбиелеп, тарихи қазынамызды сақтау, дамыту және келешек ұрпақтарға табыс ету. Бағдарламаның бағыттары әр сыныпқа жас ерекшеліктеріне байланысты бөлінген. Атап айтқанда, 1-4-сыныптар үшін “Қазақстан халқының ғасырлық салт-дәстүрлері”, ал 5-сыныптар үшін “Мен—табиғаттың бір бөлігімін”, 6-сыныпта “Кітап – ой-білімнің кәусар бұлағы” атты тақырыптарда өтсе, 7-сыныпта Жібек жолының және көне қалалардың тарихы, 8-сыныпта ата-бабаларымыздың тарихи мұрасы, 9-сыныпта ел тарихынан тәлім беріледі. Бағдарлама бойынша Жеңістің 65 жылдығына орай да іс-шаралар өтіп жатыр. Оқушыларды отансүйгіштікке тәрбиелеу, соғыс ардагерлеріне тағзым ету мақсатында Кеңес Одағының Батыры, қолбасшы Бауыржан Момышұлына арнап 5-11 сынып аралығында “Қазақ халқының ержүрек азаматы” атты сынып сағат өтті. 5-11 сынып оқушылары Отан соғысының ардагерлеріне және батыр бабаларымызға арнап өз өлеңдерін оқыды. Оқушылар қалалық “Жеңіс даңғылы” туристік экспедициясын жүзеге асыру барысында “Менің отаным—Қазақстан” экспедициясына қатысып Бауыржан Момышұлы даңғылымен жүріп өтті, 2 сынып оқушылары және сынып жетекшілері Айнаш Хасенова, Сағыныш Байболова Ұлы Отан соғысының ардагері Берлешов Барлыбай атаның үйіне барып әңгімелесіп, сыйлықтарын табыс етті. Осындай өнегелі істердің басы-қасында сынып жетекшілерімен қатар үнемі мектеп директорының тәрбие жұмыстары жөніндегі орынбасары Сәуле Байбекова табылады. Өскелең ұрпаққа тәрбие беруде ол өзінің білімі мен тәжірибесін кеңінен пайдаланып, әркез жөн-жоба көрсетіп отырады. Гүлден НҰРҚАБЫЛ, №37 мектептің мұғалімі.
