Қостанай облыстық ауруханасының бас дәрігері Юрий Моисеев қазір инфекциялық бөлімдердегі 180 науқастың 70 пайызы ауыр және орташа ауыр халде жатқанын жеткізді.
– Олардың бәрі оттегі терапиясын алуда. Қазір жансақтау бөлімінде 20 шақты науқас жатыр. Соңғы кездері Covid-19 созылмалы сипатқа ие болып барады. Ауруханаға түскен науқастардың бір айдан кейін ғана беті бері қарай бастайды. Айығып шыққан соң, дерті қайта асқынып, қайтадан ауруханаға түсіп жатқандар көп. Госпитальда жатқандардың 90%-ы – вакцина қабылдамағандар. Вакцина қабылдағандар бірен-саран ғана, – деді Ю.Моисеев.
Бас дәрігер инфекциялық стационарда жатқан науқастардың дені 50 жастан асқан адамдар екенін, бұл жаста індет жұтыру қаупі жоғары болатынын, сондықтан елуді еңсергендер ең бірінші кезекте індетке қарсы екпе алу керектігін қадап айтты.
Облыстық денсаулық сақтау басқармасының мәліметінше, бүгінде инфекциялық стационарларға қойылған 1 665 төсектік орынның 1 035-і бос тұр. Індет жұқтырған 417 баланы дәрігерлер амбулаториялық бақылауға алған. Қазір облыста Тобыл қаласындағы туберкулезге қарсы диспансер мен облыстық психикалық орталықтан өзге емдеу мекемелерінің бәрі қалыпты тәртіпте жұмыс істеп жатыр.
