Аймақтар • 20 Қазан, 2021

Қалаларды қалың тұман басып тұр

Төртінші күн Өскемен, Семей, Риддер қалаларын қалың тұман басып тұр. Қол созым жер көрінбейді. Тұманды күндерді пайдаланып, зауыттардың түтіні ауаға зиянды қалдықтарды мөлшерден тыс шығарып жатқан жоқ па? Бұл – көптің көңіліндегі сұрақ.

Мерей ҚАЙНАРҰЛЫ

«Қазгидромет» РМК филиалының ақпараты бойынша, 14 қазаннан бастап, аталған үш қалада қолайсыз метеорологиялық жағдайларға байланысты екінші дәрежелі ескерту жарияланған. Тұманды күндері экология департаментінің мамандары атмосферадағы зиянды қалдықтардың мөлшерін үнемі өлшеп, назарда ұстап отыр.

– Қолайсыз метеорологиялық жағдай бастала сала Казцинктің ауласына, жеке тұрғын үйлердің маңына барып, ауа құрамын өлшедік. Байқағанымыздай, құрылғы СО₂ оксиді нормадан көп екенін көрсетті. Негізі, мұндай жағдайда зауыттар өндіріс қуатын 20-40 пайызға дейін азайтуы керек, – дейді облыстық экология департаментінің маманы Ольга Ельчинская.

Ал облыстың бас экологы Рауан Тұраровтың кезекті рейд кезінде айтқан сөзіне сенсек, Өскемендегі зауыттар қолайсыз метеорологиялық жағдай күндері қуатын азайтқан. Алайда қала тұрғындары тамақтарын қырып, ауырып жүргенін айтады.

– Қаланың ауасы ластанып кеткен. Тұманды күндері зауыттар қарқынын күшейтетін шығар. Ол кезде бұлтпен араласқан түтінді байқамаймыз ғой. Содан тамағымыз ашып ауырады. Бірақ үйреніп кеттік, – дейді Өскемен қаласының тұрғыны Арай Серікқызы.

Иә, будақтаған түтінге, ауаның ластығына ет үйренісіп кеткелі қашан?! Десе де, қолайсыз күн райында зауыттың өнімділік қарқыны азая ма деп Казцинк басшылығынан сұрап едік, ресми сауал жіберуімізді өтінді. Жібергенімізбен, Өскемен экологиялық лас қалалардың бірі екені даусыз. Ал бірнеше күнге созылған мұндай қалың тұман соңғы 10 жылда болмаған.

Күннің маңызды және өзекті жаңалықтарын «Егемен Қазақстан» телеграм каналынан оқыңыз