ЖАУАПКЕРШІЛІК ЖҮГІН АРҚАЛАУҒА ҚАШАНДА ДАЙЫН
ENRC компаниясы 2014 жылдың 1 сәуірінен бастап қазақстандық кәсіпорындардағы өндірістік қызметкерлердің жалақыларын өсіру туралы шешім қабылдады. Жалақы барлық кәсіпорындар бойынша орташа есеппен 10 пайызға өсірілетін болады. Бұл шешім кеше Елбасы Нұрсұлтан Назарбаевтың Үкіметтің кеңейтілген отырысында берген тапсырмаларына сәйкес қабылданып отыр.
«Өз жұмысымыздың барысында біз әрқашан Елбасы мен Үкіметтің қолдауын сезінеміз. Осыған біз ризамыз. Президент Нұрсұлтан Назарбаевтың жалақыны өсіру туралы тапсырмасын орындай отырып, корпорация тағы да бір мәрте бизнестің әлеуметтік жауапкершілігіне және Қазақстан халқының әл-ауқатын көтеруге мүдделілігін көрсетті», деді осыған байланысты ENRC корпорациясының негізгі акционерлерінің бірі Александр Машкевич.
Бүгінгі таңда ENRC кәсіпорындарында 75 мыңнан астам адам жұмыс істесе, оның 69 мыңы Қазақстан аумағында орналасқан кәсіпорындарында еңбек етеді. Теңге бағамының тұрақсыздығына байланысты компания жалпы Тау-кен өнеркәсібі кешені тәрізді негізгі өнім түрлеріне деген бағаның төмендеуінен туындаған жағымсыз бәсекелестік жағдайында жұмыс істеді. Осы орайда Қазақстан Республикасы Ұлттық банкінің теңге бағамын өзгерту туралы қабылдаған шешімі кәсіпорындар экономикасын тұрақтандыруға, яғни өңірлер мен жалпы елдің дамуына жағымды ықпал етуге бағытталған шара болып табылады.
«Ұлттық валютаның нағыз бағамын белгілеу біздің инвестициялық бағдарламаларымызды қайта қарауға және жаңа жұмыс орындарын құруға мүмкіндік береді. ENRC-дің қазақстандық кәсіпорындарына капиталдық салымдар 2014 жылы 750 млн. АҚШ доллары көлемінде қарастырылған», деді одан әрі өз сөзінде А.Машкевич.
2012 жылы экономикалық қиын жағдайда ENRC қазақстандық кәсіпорындардағы жұмысшылардың жалақысын 20 пайызға өсірген болатын. Компания ұжымдық келісімшарттардағы міндеттерді орындауды одан әрі жалғастыруда. Және бизнестің әлеуметтік жауапкершілігі аясында кәсіпорын қызметкерлерінің тұрмыстық жағдайын жақсартуда қолдан келген мүмкіндіктерді жасап келеді.
ENRC тобының өндірістік активтері негізінен Қазақстан Республикасында орналасқан және оның құрамына мынандай кәсіпорындар кіреді: «Қазхром» ТҰК, Жәйрем КБК, Соколов-Сарыбай тау-кен байыту өндірістік бірлестігі (ССКӨБ), «Қазақстан алюминийі», Қазақстан электролиз зауыты (ҚЭЗ), Еуразиялық энергетикалық корпорация (ЕЭК), «Шұбаркөл Көмір» және ENRC Logistics. Осы кәсіпорындарда бүгінде 70 мыңға жуық қазақстандықтар еңбек етуде. Нақ осы мәселелерді жан-жақты тілге тиек ете келіп, Александр Машкевич ENRC-дің әлеуметтік бағдарламалары мен кәсіпорындардағы жалақы төлеудің заманауи жүйелері қызметкерлердің әлеуметтік жағдайын жақсартуға бағытталғандығын атап көрсетті.
Жылқыбай ЖАҒЫПАРҰЛЫ,
«Егемен Қазақстан».
«ҚАЗЦИНК» ЕҢБЕКАҚЫНЫ КӨТЕРУГЕ КЕПІЛДІК БЕРЕДІ
Ұлттық валюта бағамына енгізілген өзгерістер баршамызға белгілі. Аталған жағдайда мемлекетіміздің азаматтар алдындағы әлеуметтік міндеттемелерді сақтауы және орындауы үлкен маңызға ие. Біздің компаниямыз бұл міндеттің өзектілігін жіті түсінеді. Себебі, компаниямыз – еліміздегі ең үлкен ұжымы бар ірі кәсіпорындардың бірі.
Әлеуметтік міндеттемелерді орындаудың негізгі екі тетігі бар. Оның бір бөлігін Үкімет шешеді. Яғни, тұрақтандыру қоры және белгіленген бағаны бекіту жүйесін қолдану арқылы халыққа қажетті әлеуметтік-маңызды тауар түрлеріне баға өсімінің алдын алатын іс-шаралар қабылдайды.
Ал екінші бөлігін еліміздің бизнес қауымдастығы шешуі мүмкін. Бұл – бизнес секторының қолынан келеді деп ойлаймыз. Бизнестің әлеуметтік жауапкершілігі елімізде осы уақытқа дейін сәтімен жүзеге асырылып келеді. «Қазцинк» компаниясы да аталған бағдарлама аясында Шығыс Қазақстан облысындағы түрлі әлеуметтік жобаларға қолдау көрсетіп келеді.
Мемлекет басшысы Нұрсұлтан Назарбаев Үкіметтің кеңейтілген отырысында еңбекақы көтерілетінін айтты. Мемлекеттік қызметкерлермен бірге ірі кәсіпорындардың жетекшілеріне, оның ішінде өндіріс, тау-кен саласында жұмысшылардың еңбекақысын 10 пайызға көтеруге шақырды. Біз Елбасының үндеуін қабыл ала отырып, ағымдағы жылдың сәуір айынан бастап «Казцинк» кәсіпорны тобы қызметкерлерінің еңбекақысын көтеруге кепілдік береміз. Бұл – біздің ұжым қызметкерлерін қуанта отырып, еңбек өнімділігін арттыра түседі деген сенімдеміз.
Николай ПОПОВИЧ,
«Қазцинк» ЖШС басқарма төрағасы.
ЖАЛАҚЫНЫ ӨСІРУ МӘСЕЛЕСІ ШЕШІЛЕДІ
Халықтың қамын қашанда бірінші кезекте ойлайтын Елбасының кеше Үкіметтің кеңейтілген отырысында тау-кен, металлургиялық, мұнай-газ секторындағы және ұлттық компанияларға қызметкерлерінің жалақысын көтеру мәселесін қарастыруды ұсынуы өндірісті өңір жұртшылығы тарапынан зор ризалық туғызды. Отандық индустрияның қара шаңырағы әрі көш бастаушысы саналатын аймақтың басым бөлігі осы сала еңбеккерлері болуына байланысты бұл ұсыныс қуана қарсы алынса, іле оны «Арселор Миттал Теміртау» АҚ алғашқылардың бірі болып қолдауы көңілден шықты. Мұндай шешімді аталған компанияның бас директоры Виджай Махадеван мырза Астанадағы алқалы жиыннан соң металлургиялық комбинаттың ұжымы өкілдерінің қатысуымен өткен кездесуде мәлім етті. Онда «Біз Қазақстан Республикасының Президенті Н.Ә.Назарбаевтың қалың қауымның мүддесін көздеуін түсіністікпен қабылдап, өз еркімізбен 1 сәуірден бастап металлургтер мен шахтерлердің, барлық қызметкерлердің еңбекақысын 10 пайызға арттыруды ұйғардық», деді ол.
Компанияның әкімшілік директоры Анджей Выпих бұдан әрі ой-пікірлерін ортаға салғандай, кәсіпорын өндірісіндегі кейінгі жылдардағы қиын жағдайға қарамастан ұжым мүшелерінің ең өзекті мәселесі оңтайын табуға барлық мүмкіндіктерді қарастыру назардан тыс қалған емес. Елбасының қазіргі қаржылық өзгерістерге сәйкес әлеуметтің әлуетін сақтауға үндеуі оған мүдделестікті күшейте түскені аталып, үлкен қозғау салынғаны айтылды. Бір тәуірі, соңғы үш-төрт жылдағы қиындықтардың беті қайтуы біліне бастапты. Мәселен, былтырғы жылдың аяғы мен биылғы жылдың басындағы жұмыс ырғағы өндіріс тынысын қалпына келтіруге үміттендіреді. Өнімнің өзіндік құнын қалыптастыруға, сыртқы рынокқа өнімдер өткізуді ұлғайтуға, бәсекелестік қабілетті күшейтуге мүмкіндік кеңейген. Көрші елдерге соның ішінде, Иранға экспорт көлемі өсіп келеді.
Компанияның комбинаттың күш-қуатын арттыру бағытындағы мақсатынан айнымайтындығы да ортаға салынбай өтпеді. Бүгінгі негізгі міндет – табысты толықтырып, еселей түсу. Табыс мол болуына орай барлық әлеуметтік мәселелердің шешілуі де жеңіл, еңбеккерлердің жалақысы да өсе түспек. Қазақстандық металлургияның алыбының адымы алымды боларына сенім нық, деді ол.
Біз осы кездесуге келген бірнеше металлургпен тілдескенімізде, солардың бірі – жас горновойшы Әлібек Алпысбеков айтқандай, елдігіміз пен бірлігіміз, ерлігіміз бен еңбегіміз сыналатын, сынына жүріп шыңдалатын сынақ қазір. «Мен жас маман ретінде Елбасының халыққа қамқорлығын әрдайым жақсы сезінемін. Соның тағы бір айғағы – еңбекақымызды көтеруге үн тастауы болды. Расы керек, бұлай болмағанда компания әзірге әрекет жасауы беймәлім еді. Аянбай еңбек ету арқылы өз игілігімізді еселеу бізге де мерейлі міндет», деген оның сөзін әріптестері қостап, тұрақты ахуалдың сақталуына ризалық білдірді. Қанша дегенмен қаржылық өзгеріске, бағаның ептеп қымбаттауына байланысты қобалжу, абыржу білініп тұрған кезде еңбекақының өспектігі көңілге мол демеу емес пе. Бұл Елбасы ұсынысының арқасында деп біледі металлургтер мен шахтерлер. Талай қиындықты бастан өткерген қажырлы еңбеккер қауым ерік-жігері осы сын шақты да салмақтылықпен көтере білуді сездірді.
1930 жылдан бері мыс өндіріп келе жатқан «Қазақмыс» компаниясы өңір экономикасының өзегін құрайды. Нарықтық капиталдандыру бағасы 2012 жылдың аяғының өзінде 6,6 млрд. АҚШ доллары болған кәсіпорын басшылығы да Президент Нұрсұлтан Назарбаевтың жалақыны көтеру жөніндегі ұсынысын қолдайтындығы күмәнсіз. Бұл жөнінде нақты шешім дәл кеше қабылдана қоймағанымен, Елбасының еңбек адамының жағдайын жасауға қатысты ойы мыс өндірушілердің жұмысын ұйымдастырушылар тарапынан түсіністік тауып отыр. Компания басшылығы осы мәселе бойынша таяу күндерде арнаулы мәлімдеме жасамақшы.
Айқын НЕСІПБАЙ,
«Егемен Қазақстан».
ТЕМІРТАУ.
