Әлем • 22 Қазан, 2021

Пандемия: Үндістан үшінші толқынға дайын ба?

31 рет көрсетілді

Үндістан 21 қазан күні COVID-19-ға қарсы вакциналау кезінде 1 миллиард доза межеден асқанын жариялап, оны тарихи оқиғаға балады. Бұл шара көпшіліктің үшінші тол­қын туралы қорқынышын жоққа шығара ала ма деген сұрақ туындайды.

Ел үкіметі тұрғындарға ауыр соққан індеттің екінші тол­қыны­нан кейін бұл нәтиже жағдайды жақсартады деп отыр. Вакцина алуға рұқсат етілген халықтың 75 пайызына екпенің бірінші компонентін, ал 30 пайызына екеуін де салып үлгерген.

1 миллиардтық межеге 40 аптадан аз уақыт ішінде қол жет­кізілген. Ал елдегі вакцинаның алғашқы дозасы 2021 жылы 16 қаңтарда салына бастаған. Бұл 1 миллиард вакцина дозасының барлығы дерлік Үндістанда жа­сал­ғанын айта кеткен жөн.

Осыған байланысты Үндістан­ның Қазақстан Республи­ка­сындағы елшісі Шубдхаршини Трипати пікір білдірді.

– Қазіргідей күрделі кезеңге қара­мастан, Үндістан маңызды межеге аз уақыт ішінде қол жеткіз­ді. Еліміздің мұндай жетіс­тікке жетуі тиянақты жоспарлаудың, жүзеге асырудың, кәсіби ғылыми-зерттеу жұмыстарының нәтижелі болғанын көрсетеді, – деді Үндіс­танның Қазақстандағы елшісі.

Ол сондай-ақ Үндістан әлемнің 150-ден астам елімен өзінің ресурсымен, білімі, тәжірибесімен және дәрі-дәрмекпен бөліскенін мәлімдеді.

Елдің премьер-министрі бұл нәтижені үлкен жетістікке балап, «үнді ғылымының жеңісіне, 1,3 миллиард үнді халқының іскерлігі мен ұжымдық рухына куә болып отырмыз» деп жазды Twitter парақшасында.

Елде індеттің үшінші то­лқыны белең алуы мүмкін деген қор­қыныш азая бастады. Ал көптеген бастауыш сыныптарының оқу­шылары 2020 жылдың наурызынан бастап жабылған мектептеріне орала бастады.

Johns Hopkins Bloomberg Қоғамдық денсаулық сақтау мектебінде жұмыс істейтін Нью-Делидегі эпидемиолог Брайан Вал бұл оқиғаны үлкен жетістікке теңеді. Оның ойынша, вирустың жылдам таралуы мен жоғары вакциналау деңгейін ескере отырып, індеттің үшінші толқыны екіншісімен тең немесе одан да ауыр болуы мүмкін деген болжамдардың орындалуы екіталай.

Үндістанда ірі вакцина өндіруші Serum институты ор­наласқанына қарамастан қаң­тарда басталған вакциналау процесі баяу жүрген. Оған халық­тың екпе алуға ниетінің төмен­дігі мен жеткізу мәселелері қосыл­ған. Алайда «Дельта» штамы тара­ға­н­нан бастап вакцинаға деген сұраныс күрт өскен.

Үндістан 18 жасқа дейінгі балаларды вакциналауды әлі бастаған жоқ, бұл ел халқының 40 пайызын құрайды. Сондай-ақ тұрғындар арасында індеттен толық қорғайтын вакцинаның екінші компонентін алуға деген ынтаның азая бастағаны да айтыла бастады. Билік өкілдері де бұл мәселеден хабардар. Сол себепті үкімет аймақ басшыларын вакцинаның екінші дозасын салуды назарға алуға шақырды. Және екі доза арасындағы үлкен айырмашылықты жоюдың жолдары қарастырылып жатқаны да хабарланған.

Індет өршіген тұста халық вакцинаға мұқтаж болып, екпе алуға асыққан, ал толқын аяқ­талып, жағдай жақсара бас­тағанда адамдар бұрынғы өмір ырғағына қайта оралып, екпенің екінші бөлігін алуды ұмытып та кеткен секілді.

Үндістанда пандемия бастал­ғалы бері 34 миллион адам індет жұқтырған және 450 мыңнан астамы қайтыс болған. Тәуелсіз эпидемиологтер вирустың таралуы мен өлім-жітімнің нақты саны ресми статистикадан әлде­қайда жоғары болуы мүмкін деп есептейді.

Дегенмен Үндістан аз уақытта жеткен, яғни жоғарыда аталған нәтижені жақсылыққа балап, індеттің таралуын азайтады деп үміттеніп отыр.

 

Соңғы жаңалықтар

Ырысты ынтымақтың ұйытқысы

Елбасы • Бүгін, 01:03

Инвестиция үшін тартымды ел

Тәуелсіздіктің 30 жылдығы • Бүгін, 00:38

Көне мұралар – халық қазынасы

Руханият • Бүгін, 00:12

Атам айтқан жарық жұлдыз

Тәуелсіздіктің 30 жылдығы • Бүгін, 00:04

Иранның таңдауы

Саясат • Кеше

Ұқсас жаңалықтар