«Биыл елордада ұстаздар күні қарсаңында ұлт ұстазы Ыбырай Алтынсаринге бюст ашылды. Салтанатты шараға зиялы қауым өкілдері қатысты. Және қазіргі таңда ономастикалық комиссия отырысында қаладағы №83 мектепке Ыбырай Алтынсарин атауын беруді қарастырып жатырмыз. Әрине, заң аясында жүзеге асатын процесс, сондықтан уақытты талап етіледі. Оның үстіне шешімді тек әкімдік қана қабылдамайды, жұртшылықпен ақылдасып шешіледі. Ономастика комиссиясы құрамында мемлекеттік орган өкілдерінен бөлек, қоғам қайраткерлері, зиялы қауым, үкіметтік емес ұйым өкілдерімен қоса белсенді азаматтар бар», деді А. Оралов.
Оның айтуынша мектепке ағартушының есімін беру туралы шешім осы айдың соңында немесе қарашаның басында шығады.
«Мектепке Ыбырай атамыздың атын беру бастамасын бәрі бірауыздан қолдайды деп ойлаймын. Тұлғаның ұлттық білім саласына сіңірген еңбегі мен қалдырған мұрасы баршамызға аян», дейді ол.
