«Өңірдегі Ресей облыстарымен шекаралас бекеттерде күні-түні тұрақты бақылау жүргізіледі. Мемлекеттік шекараның 4 автомобиль өткізу бекеті бақыланады. Ресей, Беларусь елдерінің азаматтарына облыс шекарасынан өтуге тыйым салынған. Егер барлық карантиндік шара сақталса, онда біздің өңірге локдаун енгізудің қажеті болмайды. Бұл індет жұқтырған науқастардың санына байланысты», деді А.Сейітқазинов.
Ал облыстық санитарлық-эпидемиологиялық бақылау департаментінің мәліметінше, тексеру анықтамалары бар 491 жаяу адам және 253-і жүк көлігінің жүргізушісі шекарадан бері қарай өткен. Карантиндік стационарға 10 адам орналастырылса, 4 шетелдік шекарадан кері қайтарылған.
Облыстық санитарлық-эпидемиологиялық бақылау департаментінің мәліметінше, қазан айының соңғы күндері өңірде індет жұқтырған 49 331 науқас тіркелсе, 27 035 науқас – облыс орталығының тұрғындары. Эпидемиологтердің бағалауы бойынша, індет инфекциясымен ауырған сырқаттанушылық бойынша өңірде жағдай әлі тұрақсыз.
«Сырқаттанғандардың арасында 296 науқас басқа өңірлерден жұқтырғаны анықталды. Жалпы, науқастар көрсеткіші 100 мың тұрғынға шаққанда 6 558,4-ті құрайды. Павлодар, Екібастұз, Ақсу қалалары, Ақтоғай, Успен, Павлодар, Май, Аққулы, Ертіс аудандары – «қызыл аймақта», Шарбақты, Железин, Тереңкөл аудандары – «сары аймақта», ал Баянауыл ауданы «жасыл аймаққа» өтті», делінген департамент мәліметінде.
Мысалы, 11 830 науқас індет жұқтырған адамдар арасында байланыста болса, 33 416 науқас – пневмониямен ауырғандар және өзін өзі үйде емдегендер. Сондай-ақ 3 789 науқас профилактикалық мақсатта емханаға тексерілген кезде анықталған. Вирусты анықтау мақсатында зертханаларда тәулігіне 2 030 зерттеу жасалады.
Өңір шілде айынан бастап қоңыр күзге дейін «қызыл аймақта» тұр. Карантин шараларын қатаң сақтау барысы бақылауда. Бірақ облыс орталығындағы қоғамдық көліктер толы, автобустар жиі жүрмейді. Ойын-сауық, той-томалақтар жалғасуда. Науқастар саны күрт көбейіп кетсе, карантин шаралары қайта күшейтілуі де әбден мүмкін. Сондықтан облыстық денсаулық сақтау басқармасы індеттің «ызғары азайды» деп еркіндікке бой алдырмай, сақтық шараларына мән беруіне, індетке қарсы екпе салдыруға шақырады. Өйткені елімізде күзге дейін ұжымдық иммунитетті қалыптастыру жайы айтылды. Індеттің түрлі штамына қарсы тұру үшін екпе алып, тұрғындар өз денсаулығын сақтауы қажет. Ұжымдағы қызметкерлердің, өндіріс орындарындағы жұмысшылардың, жалпы, халықтың санитарлық-эпидемиологиялық саламаттылығын қамтамасыз ету үшін инфекциялық аурулардың иммунопрофилактикалық іс-шаралары жалғасуда.
Қазір өңірдегі аурухана, емханаларда 153, сауда үйлерінде, кәсіпорындарда және басқа да нысандарда 14 егу бөлімшесі орналасқан. Облыс орталығында еңбек ұжымдарына арналған 67 мобильді топ жұмыс істеуде.
Ал облыстық санитарлық-эпидемиологиялық бақылау департаментінің 21 қазандағы эпидемиялық жағдай туралы деректеріне көз салсақ, өңірде тағы 202 адамнан індет жұқтыру жағдайы анықталған, 98 науқас сауығып шыққан екен.
Павлодар облысы
