Сенім арт маған, туған ел!

«Жас келсе – іске» дейді хал­қымыз. Жастар – қашанда тың идея­лардың қайнар көзі, оң өзге­рістердің қозғаушы күші. Сон­дықтан өскелең ұрпақтың осындай әлеуетін дұрыс арнаға бағыттап, тиімді пайдалануы­мыз керек» деп ел Президенті Қасым-Жомарт Тоқаев бір сөзінде атап көрсеткен болатын. Бүгінгі жастар барынша білімді болып, өр­кениетті елдердің өрісін аңдап, жасампаз жаңалықтарды жас жанына сіңіріп, алға ұмтылулары керек.

Форумға ел ішіндегі игі­лікті істерге ұйытқы болып жүр­ген жастар қозғалысының же­тек­шілері, ел шетіне жаман тұ­маудың жан тітірентер сұрапыл хабары жеткенде бастарын бәй­геге тігіп, небір толымды шаруа­ларды атқарған еріктілер ұйым­дарының өкілдері, алдарынан жұмыс үркіп отыратын, тепкен тасы өрге домалап тұрған жас кәсіпкерлер мен тәуелсіздік­тің құрдастары қатысты.

Алдымен сөз алған облыстық ішкі саясат басқармасы басшы­сының орынбасары Нариман Әбдірахманов ел үміт артып отырған жастардың тәуелсіздік жылдары атқарған толымды ісін тарқатып айтып берді. Алдағы асқаралы міндет жүгі сараланды.

– Бүгінгі таңда жастардың мәселелері де аз емес. Айта­лық, жоғары оқу орнының сту­денттері білім берудің дәстүрлі фор­матына көшкен кезде бір­қатар өңірде жатақхана же­тіс­пей, қиындық көруде, – деді «Қазақстан студенттерінің Альян­сы» республикалық студенттер қозғалысы» қоғам­дық бірлестігінің президенті Ілияс Түстікбаев. – Жатақхана бөлмелеріне әлеуметтік қа­шық­тықты сақтап орналасу тәр­тібі­не байланысты орынның азайып қалуы себепті зәрулік туын­дап отыр. Осы орайда біз оқу орындарының басшыла­рына қаладағы қонақүй иеле­рімен және пәтерлерін жалға берушілермен келісім жасасып, орналастыру жағын қарас­тырудамыз. Көкшетаудан аса көп арыз-шағым түсіп жатқан жоқ. Жалпы, студенттер белсенді болулары керек. Олар білім беру саласының тыныс-тіршілігіне өздері араласып, қозғаушы күш болып, стипендия тағайындау мен оқу гранттарын бөлуге қа­тысып отырса, барлық мәселе әділ шешілетіндігіне күмән жоқ.

Жастардың бойындағы жа­лын жігердің, қиын кезеңде ел иығына түскен салмақты бір­лесе көтеріп, жалпақ жұрттың бірлігін нығайтып, игілікті істер­ге ұйытқы болып, аянбай атсалысатынын көз көріп жүр. Пан­демия басталғалы облыс жастары жалғызбасты, егде адамдарды, көпбалалы отбасыларын қамқорлықтарына алып, келелі шаруалар атқарды. Емханаға бекітілген созылмалы сырқаты бар адамдарға дәрі-дәрмектерін жеткізіп берді. Қарға адым жер мұң болып, қол қысқарғанда азық-түлік себеттерін дайындап, жан жылуын төкті. Күнделікті тұрмысқа қажетті заттармен бірге жылы киімдер жинасты. Қақаған қыста солтүстіктің сі­рес­кен қарынан аулаларды та­зартып, отын-көмірлерін үйіп беруге қолұшын берді. Осы­лайша, жанашырлығы мол жас­тар қам көңілді қариялар­дың қиындықтың құрсауында жал­ғыз қалып қоймайтынын аңғар­тып, ет жүректерін елжіретті.

Кәсіпкер жастар өз алдына тырбанып, бойларындағы бі­лім мен білікті, қажыр мен қай­ратты жұмылдырып, ел игі­лігін молайтуға атсалысуда. Олар өздерінің қарақан бас­та­рының қамы үшін емес, заман­дастарының да әлеуметтік-тұрмыстық жағдайларын жақ­сартуға мол үлес қосуда. Ай­талық, бір кәсіпкер өз ісін бастаса, соның маңайында топтасқан өзгелер жұмысқа орналасады, яғни жаңа жұмыс орындары ашылады.

– Біз өзіміздің қолымыздан іс келетінін көрсетуіміз керек, – дейді тәуелсіздік құрдасы, жат­тықтырушы Мирзада Сейітқа­ли. – Ол үшін біздің замандастарымыз саламатты өмір салтын берік ұстап, спортты серік еткендері ләзім. Тепсе темір үзетін дені сау ұрпақ жалқының ғана жетістігі емес, қоғамның байлығы.

Форумға қатысушылар сұ­рақ-жауап түріндегі сұхбат алаңын­да өздерін толғанды­рып жүр­ген келелі мәселелерді кеңінен талқылап, ой талқысын өрбітті. Облыс орталығындағы Шоқан Уәлиханов атындағы, Абай Мыр­­захметов атындағы универси­теттермен студент­тер мәселесі екшелген меморандум­ға қол қойылды.

Жастардың мәселесін көк­сеген жиын Jas sarbaz лагерін­де жалғасты. Тамылжыған таби­ғат аясында жас көкіректер­ден ұшқындаған алау оты жалпақ елдің жас буынын қамтып, арман отын жандырып тұрғандай әдемі әсер қалды.

КӨКШЕТАУ