Аймақтар • 26 Қазан, 2021

Тарбағатайлық коллекционер тартуы

313 рет
көрсетілді
2 мин
оқу үшін

Қазақстан Республикасы Қарулы Күштері Әскери-тарихи музейінде «Тарихи мұра – ұрпаққа аманат» атты көрме өтіп, нәтижесінде мекеме қорындағы жәдігерлер саны үш жүз дана тың мұрамен толықты.

Тарбағатайлық коллекционер тартуы

Көрме сөресіне – Кеңес кезіндегі әскери киім үлгілері, тулар, тұрмыстық заттар, музыка аспаптары, сонымен қатар 1941 жылы шығарылған неміс­тің жауынгерлік велосипеді қатарлы жәдігерлер қойылса, бұл бұйымдар түгелдей дерлік Ұлы Отан соғысы жылдары шығарылған екен. Атап айтар болсақ, көпшілікке ұсынған экспонаттар қатарында: 1940-жылы өн­ді­рілген немістің әріп теретін машинкасы,  керосин шамы, неміс офицері­нің жорық сандығы, ішкі от имитаторы бар «Буржуйка» пеші, кеңестік әскери барабан, латун түтігі, «Брянск» тара­зы­сы, офицердің былғары планшеті, IRANY компасы, соғыс жылдарындағы «Вермахт» құтысы, «Амата» оттығы, қызыл әскер фуражкасы, папаха, неміс каскасы, оқ-дәрі фрагменті, барабанды оқсауыт, «ТА-57» маркалы телефон аппараты, металл қорамсақ, т.б.

а

п

Жоғарыдағы 300-ден астам жәдігер­ді әскери-тарихи музейге сыйға тарт­қан белгілі коллекционер Болат Тағабай. Ол кісі бұл дүниелерді 20 жылдан бері жинаған екен. Бірін сонау Варшавадан алдырса, қалғанын Ресей және еліміздің батыс өңірінен тірнектеп тапқан. Мұра жинаушы Болат Құнанбайұлы қазір Шығыс Қазақстан облысы Тарбағатай ауданы Ақсуат ауылында тұрады. Бұған дейін 35 мың асық жинап 2014 жылы Халықара­лық интеррекорд гиннестер кітабына, 2017 жылы Қазақстан гиннес­тер рекорды кітабына есімі тіркелгені жайынан көпшілік қауым хабардар. Ал бұл реткі ісі ерлікке татырлық. Айт­пақшы, коллекционер жоғарыдағы жә­дігерлердің сыртында, музейге өз атынан 5000 асық сыйлады.

Аталған шара жайлы Әскери-та­ри­хи музей басшысы полковник Нұр­таза Әсілов: «Бұл оқиға жас  ұрпақ­тың бойында патриотизм мен азамат­тық жауапкершілікті қалыптастыру­ға,  Отанға деген сүйіспеншілік пен ел тарихына деген қызығушылығын арттыруға, мәдениетін дамытуға, сонымен қатар музейге келушілер үшін құнды жәдігерлермен танысуға жасалған зор мүмкіндік» деді.