Екі ұжым үшін де бұл жолғы ойынның маңыздылығы өте ерекше еді. Себебі «Қайрат» өз алаңындағы ойында «Астанадан» жеңіліп, елордалық клубқа үш ұпайды оп-оңай ұстата салатын болса, онда чемпионаттағы басты қарсыласына чемпиондық тәжді де өз қолымен тапсыратын еді. Алматылық ұжым үшін «Орталық» стадионда, оның үстіне өз жанкүйерлерінің қолдауымен өткен ойында «Астанадан» жеңілуге болмайды. Сондықтан бұл ойында алматылық клубты тек жеңіс қана қанағаттандыратын.
Ал «Астана» ойыншылары жеңіске жететін болса, сырт алаңда басты қарсыластарынан басым түсіп, бір жыл бұрын пандемияға байланысты Алматыда өткен біріншілікте жіберген есесі мен чемпиондық атағын да қайтарып алуға тағы бір маңызды қадам жасайтын еді. Өйткені турнир кестесінде «Астананы» өкшелеп келе жатқан «Тобыл» елордалықтардан бір ұпай қалып келе жатқан-ды. Сол үшін бұл ойында «Астанаға» үш ұпай ауадай қажет болатын.
Кездесудің алғашқы минуттарында «Астана» футболшылары белсендірек болып, «Қайрат» қақпасының алдында бірқатар қауіпті шабуыл ұйымдастырып үлгерді. Бірақ қарымта шабуылға иек артқан алаң қожайындары 8-минутта гол соғып, есепте алға шықты. Голдың авторы – Небойша Косович. Ян Вороговскийдің асырған пасы алғашында «Астана» ойыншысына тиіп, кері қайтты. Кейіннен допқа «Қайраттың» черногориялық футболшысы бірінші жетіп, «Астана» қақпашысын қапы қалдырды. Бұл есеп матч соңына дейін өзгеріссіз қалды.
Бірінші таймның соңына қарай матчта қызық оқиға орын алды. «Астананың» бас бапкері Андрей Тихоновқа кездесудің бас төрешісі Игорь Чесноковтың алаңдағы іс-әрекеті ұнамаса керек, шәкірттерін бірінші кезеңнің аяқталуына екі минут қалғанда киініп-шешіну бөлмесіне алып кетті. Бірақ арада бірнеше минут өткенде футболшылар қайта алаңға шығып, ойынды жалғастырды. Матчтан кейін Тихонов ойын сәтінде алаңнан шығып кету өзінің емес, футболшылардың ортақ шешімі екенін айтты.
Жалпы, бұл – Қазақстан футбол тарихындағы бірінші жағдай емес. Бұған дейін «Қайсар» және «Қайрат» футболшылары да осындай жағдайды бастан өткеріп, алаңды тастап кеткен болатын. Бір қызығы, олар сол кеткеннен жасыл алаңға қайта оралмаған еді.
Осылайша «Қайрат» маңызды ойында қарсыласынан 1:0 есебімен басым түсті. Ал қатар өткен «Тобыл» мен «Шахтер» арасындағы кездесуде қостанайлық ұжым жеңіске жетіп, турнир кестесінде бірінші орынға көтерілді. Қостанайға екінші құраммен келген «Шахтер» алаң иелерінен ірі есеппен жеңілді. Матчтың 16-минутында Александр Марочкин гол соқса, кейін Игорь Сергеев есепті еселеді. Ал екінші таймда Азат Нұрғалиев пен Элгуджа Лобжанидзе бір-бір гол салып, матчтың нүктесін қойды. Қонақтар сапынан жұбаныш голын Андрей Гиоргиади соқты. Осылайша бұл матч 4:1 есебімен «Тобылдың» пайдасына шешілді.
«Шахтер» бұл ойында жеңсе де, жеңілсе де ештеңе жоғалтпайтын болған соң, бар күшін алда болатын ел кубогындағы матчқа сақтап, Қостанайға жас футболшыларын жіберді. Ал негізгі құрамның футболшылары кубок бәсекесінде «Таразбен» өтетін матчқа дайындалып жатыр.
25-турдың қалған ойындарының нәтижесі мынадай: «Ордабасы» – «Тараз» – 2:1, «Тұран» – «Ақтөбе» – 1:2, «Қайсар» – «Жетісу» – 0:1, «Каспий» – «Ақжайық» – 2:2, «Атырау» – «Қызылжар» – 0:0:
Биылғы біріншілікте кім чемпион болатынын соңғы тур ойындары анықтап береді. Бұған дейінгі чемпионаттарда жеңімпаз команда 3-4 тур бұрын анықталып қоятын болса, биыл бірінші рет чемпион команда соңғы турда анықталмақ.
30 қазанда өтетін 26-тур ойындарында мына командалар кездеседі: «Тараз» – «Қайсар», «Жетісу» – «Қайрат», «Астана» – «Тұран», «Ақтөбе» – «Каспий», «Ақжайық» – «Тобыл», «Шахтер» – «Атырау» және «Қызылжар» – «Ордабасы».
