Биыл тарихымызды таразылаған іргелі туындының жарыққа шыққанына елу жыл толды. Осыған орай көрме аясында Ілияс Есенберлиннің 6 томдық толық шығармалар жинағының тұсаукесері өтті. Басылымға жазушының барлық шығармасы, оның ішінде «Көшпенділер» және «Алтын Орда» тарихи эпопеялары, сонымен қатар кеңестік кезеңде жарық көрмей қалған романдары да еніп отыр. Айтулы еңбек Нұрсұлтан Назарбаев қоры, Нұрлан Смағұлов қоры және «Монтажспецстрой» АҚ қолдауларымен жарық көрген.
Көрменің салтанатты ашылу рәсіміне Қазақстанның халық жазушысы, ақын Олжас Сүлейменов, Мемлекеттік орталық музейінің директоры Нұрсан Әлімбай, Атбасар қаласындағы Ілияс Есенберлин музейінің директоры Ұлбосын Даниярқызы, І.Есенберлин атындағы №25 гимназияның ұстаздары қатысты. Жазушының отбасы атынан немересі Мәди Есенберлин сөз сөйледі. Тағылымды іс-шарада көрнекті қаламгердің еңбек жолы, шығармалары мен өмірі жайлы өзекті ойлар айтылып, Есенберлин еңбектерінің ұрпақ тәрбиесіндегі маңыздылығы атап өтілді.
– Тарихи романның идеялық көркемдік биігі жоғары. Халқымыздың сан ғасырлық тағдырын кестелі тілмен бейнелеген шығарма уақыт өткен сайын өзінің өміршеңдігін көрсетіп отыр. Жалпы, Ілияс Есенберлин мұрасы ұлт әдебиеті мен мәдениетінің баға жетпес қазынасы. Бүгінгі көрмеде тағылымды тұлғаның өмір белестерінен сыр шертетін құнды жәдігерлер көпшілік назарына ұсынылды. Бұл өскелең ұрпақты ата баба өмірінен тағылым алып, ұлтының тарихын жадында зерделеуге шақырады деп сенеміз, – дейді Нұрсан Әлімбай.
АЛМАТЫ
