Тараз қаласында оған алғаш рет ота жасалды
Тараз қаласының № 1 қалалық ауруханасының нейрохирургия бөлімшесінде Астана қаласының республикалық нейрохирургия орталығының ғылыми қызметкері, медицина ғылымдарының кандидаты Виктор Олейниковтың басшылығымен «шеберлік сыныбы» өтті. Ол мұнда омыртқа сынығы және жұлынның ауыр жарақаттарына ота жасады.
Жамбыл облысында алғаш рет жасалып отырған бұл күрделі ота үшін жоғары технологиялық металл конструкция мен арнайы құрылғылар қолданылды. Нейрохирургия бөлімшесінің меңгерушісі Бахытжан Досжановтың айтуынша, бүгінде омыртқа жарақаты әлемдік медицинаның көкейкесті мәселелерінің біріне айналған. Жыл сайын №1 қалалық аурухананың нейрохирургия бөлімшесіне 40-50 адам омыртқаның түрлі зақымдануы салдарынан келіп түседі. Олар ұзақ уақыт төсек тартып жатады және әртүрлі топтағы мүгедек болып қалады.
Омыртқаға жасалатын оталар күрделі және оның бағасы да қымбат. Бұрын мұндай оталарды жасау үшін облыста қажетті құрал-жабдықтар болмағандықтан, науқастар Алматы мен Астана қалаларындағы нейрохирургиялық орталықтарға жіберілетін. Енді мұндай оталар облыстың өзінде жасалатын болды.
Ең бастысы, оталық араласулар бел омыртқасынан жарақат алғандардың ертерек сауығып кетуіне, сөйтіп, еңбек ету қабілетінің қайта қалпына келуіне және олардың мүгедектік болып қалмауына мүмкіндік береді.
Көсемәлі СӘТТІБАЙҰЛЫ,
«Егемен Қазақстан».
Жамбыл облысы.