Қазақстан • 27 Қазан, 2021

Қазақстандық жауынгердің сүйегі елге жеткізілді

932 рет көрсетілді

26-шы қазанда Ұлттық ұлан әскери әуе кемесі Ураина астанасы – Киевтен Ұлы Отан соғысында ерлікпен қаза тапқан қазақстандық жауынгер Өксікбай Бозарбаевтың сүйегін туған жеріне алып келді, деп хабарлайды Egemen.kz.

Ботакөз БАҚБЕРГЕН

Киевтен келген арнайы борт ҚР Қорғаныс министрлігі 19232 әскери бөліміне кешкі сағат 19:00-де келіп қонды. Қазақстандық сарбаздың құрметіне орай Құрмет қарауыл ротасы сап түзеп, әскери оркестр еліміздің әнұранын орындады. Ерлік жолында қаза тапқан жауынгерді қарсы алу салтанатына Қорғаныс министрлігі, Ұлттық ұлан сардарлары, «Атамның аманаты» қоғамдық бірлестігі және әскери бөлім басшылығы мен жеке құрамы қатысты.

«Атамның аманаты» қоғамдық бірлестігі әлемдік пандемияға қарамастан биыл тоғыз отандасымыздың сүйегін туған жеріне алып келуді іске асырды.

«Украинадан Ұлы Отан соғысында қаза тапқан қазақстандық сарбаздың сүйегін алғаш рет жеткізіп отырмыз. Осы игілікті іске көмектескен «Плацдарм» іздеу тобына ағысымызды білдіреміз. Олар сарбаздың сүйегін тауып, аты-жөнін анықтап, көп жұмыс атқарды. Сондай-ақ, Қазақстан Республикасының Украинадағы елшілігіне, ұшақпен көмектескен Ұлттық ұлан басшылығына, жауынгердің сүйегін салтанатты түрде қарсы алуға атсалысқан Қорғаныс министрлігіне үлкен алғыс айтамыз. Бұл жұмыс ерлік туралы естеліктерді сақтауға, ұрпақ тәрбиесіне өте қажет деп білеміз», деді «Атамның аманаты» қоғамдық бірлестігі басқармасының төрағасы Мұрат Молдағалиев.

Қазақстандық сарбаз Өксікбай Бозарбаев қан майданға Түркістан облысы Алғабас ауылынан аттанған. Сталинград шайқасында ерлік көрсетіп, бірнеше мәрте жарақат алып, бірқатар медальдармен марапатталған. Ол Украина елінің Донецк өңірінде орын алған шайқаста ерлікпен қаза тапты. Алғабас ауылында Өксікбаевтан тараған немерелері тұрады. Мұрат Жанатайұлының айтуынша, қазақстандық жауынгерді Қорғаныс министрлігінің арнайы бортымен туған ауылына жеткізу жоспарланған. Сарбазды туған ұрпақтары, Түркістан облыстық әкімдігі мен қоғамдық ұйымдар өкілдері қарсы алып, туған жердің топырағына тапсырады.