Бұл деректер облыстағы санитарлық-эпидемиялық жағдай баяндалған аппараттық жиналыста айтылды. Коронавирус аурушаңдығы бойынша «жасыл» аймақта орналасқан өңірде күнделікті тіркеліп отырған науқастар көрсеткіші де республикада төмен. Дегенмен облыс әкімі Өмірзақ Шөкеев барлық карантиндік талаптарды қатаң сақтап, босаңсуға болмайтынын айтты.
«Босаңсуға болмайды. Қазір өздеріңіз білесіздер, Ресейде бұл ауру өcіп жатыр. Шекаралас аумақтар арқылы бізге де жететіні түсінікті жағдай. Осыған дейінгі жағдайлар қайталанбас үшін дайындалу керек. Вирусқа қарсы күрес шаралары қатаң сақталуы тиіс. Сосын мектептерде өте қатаң қадағалау орнату керек», деді облыс әкімі.
Коронавирусқа қарсы вакциналау қарқыны бойынша облыс елімізде алдыңғы қатарда. Ақпан айынан бастап вакцинаның 974 435 дозасы жеткізілді. Жалпы, 150 егу пунктінде І компонентпен – 972 382 адам (1-кезең бойынша вакциналау қамту пайызы – 92,0%), ІІ компонентпен – 873 912 адам (2-кезең бойынша– 82,5%) вакцина алған.
Ал биылғы III тоқсанның қорытындысы бойынша өткен кеңейтілген алқа отырысында облыстық қоғамдық денсаулық басқармасының басшысы Марат Пашимов эпидемиялық жағдай тұрақты екенін мәлім етті. Өңірде ана өлімі 28,4%, ал сәби өлімі 7,9%-ды құрайды. Осы орайда ана мен бала саулығын сақтап, халықтың денсаулығын жақсартуға бағытталған іс-шаралар тұрақты түрде жалғаса бермек. Мысалы, жуырда Түркістанда Абу-Дабидің тақ мұрагері шейх Мұхаммед бен Заид Әл Нахаян атындағы 80 орындық перзентхананың құрылысы басталды. Біріккен Араб Әмірліктері Премьер-Министрінің орынбасары, Президент істері жөніндегі министрі шейх Мансур бен Заид Әл Нахаян мен Түркістан облысының әкімі Өмірзақ Шөкеев жаңа «Ана мен бала орталығының» іргетасына капсула салды.
«Біз денсаулық сақтау саласының маңызды нысандарының бірі – Шейх Мансур бен Заид Әл Нахаянның Түркістан тұрғындары үшін қайырымдылық көмегі болып табылатын құрылыс алаңына капсула саламыз. Жобаны Түркістан облысы әкімдігі мен Абу-Даби даму қоры бірлесіп жүзеге асырып жатыр. Бастама Біріккен Араб Әмірліктері мен Қазақстан Республикасы арасындағы тығыз тарихи байланыстар мен стратегиялық әріптестікті нығайтудың символы, сондай-ақ Қазақстан халқының денсаулығын нығайтуға және Түркістан қаласының инфрақұрылымын дамытуға қосқан үлесі болып табылады», делінген капсуладағы жазбада.
Еуропалық үлгіде салынатын заманауи перзентхананың құрылысы келер жылы аяқталады деп жоспарланған.
Сондай-ақ кеңейтілген отырыста басқарма басшысы облыс бойынша туберкулездің таралуы 100 мың тұрғынға 25,8% құрайтынын, балалардың арасында туберкулез 2,1 пайызға төмендегенін айтып өтті. Қалалық және аудандық деңгейдегі медициналық ұйымдар 82% интернетке қолжетімді, цифрландырумен толық қамтамасыз етілген.
Түркістан облысы
