Отбасындағы агрессордың құрбандары – нәзік жандылар, тіптен балалардың денсаулығына зиян келіп, психологиялық күйзеліске душар болып жатқан жағдайлар аз емес. Gulbolsyn жобасы осы орайда қаладағы нәзік жандылардың құқықтарын қорғауға, зорлық-зомбылықтан зардап шеккендерге көмек беріп, қолдау көрсетуге, өзіне-өзі қол жұмсау жағдайларының алдын алу мақсатында жұмыс істеуде.
Аталған жоба Алматының дағдарыс орталықтарымен, сонымен қатар әлеуметтік ана орталықтарының желісі – «Бақытты отбасы» бастамасымен бірге белсенді жүзеге асып келеді. Осы орайда дау-дамайды шешу, теңдік мәселелері, тұрмыстық зорлық-зомбылықтың алдын алу бойынша пікір алаңдары мен кездесулер ұйымдастырылып отырады. Кеңес беру үшін қабылдау бөлімдері ашылып, психологтер, заңгерлер, жаттықтырушылар сияқты мамандар қызметі жолға қойылған әрі сенім телефондары дамылсыз қоңырау қабылдайды. Осы орталық мамандарынан жоба басталған аралықта 1552 адам көмек алса, олардың үрей мен қорқыныштан арылып, жаңаша өмір бастауға ұмтылысы қуантады. Орталық мамандарының кеңесінің арқасында күш-қуат алып, қалыпты жағдайда өмір сүруге бел буған нәзік жандылар тың бастамалардың, жаңа істердің бастамашысы бола білуде. Жоба осы жылдың желтоқсан айына дейін жалғасады.
АЛМАТЫ
