Сербияда сәтті өнер көрсетуде

Белградтағы әлем чемпио­на­тының аса жеңіл салмағында ел намысын қорғап жатқан Теміртас Жүсіпов отандастарымыз арасында бірінші болып құрлық бірін­шілігінің ширек финалына жолдама алды. Сондай-ақ Те­­міртас біріншілікке қатысып жатқан чемпионаттағы ең жасы үлкен боксшылардың бірі саналады. 48 кг-да Қазақстанның бес дүркін чемпионы, 2013 жыл­ғы Азия чемпионы, жуырда ғана Ресейде өткен әскерилер ара­сын­дағы жаһандық доданың же­ңім­пазы Жүсіпов Сербия шаршы ала­ңындағы бірінші кездесуін жарыс қожайыны, 19 жастағы Омер Аметовичпен өткізді. Өзінен 14 жас кіші боксшымен жұды­рық­тасқан Теміртас 4:1 есебімен еш қиындықсыз келесі кезеңге өтті.

Отандасымыз жартылай фи­налға шығу үшін Өзбекс­тан­ның үкілі үміті – Нодир­жон Мир­захмедовпен қолғап түйіс­тіреді. Бұл – осы чемпионаттағы қа­зақ-өзбек текетіресінің төртіншісі (Сәкен Бибосынов – Хасанбой Дусматов; Асланбек Шым­бер­генов – Шахрам Гиясов; Айбек Орал­бай – Мадияр Саидрахимов) бол­мақ. Азия чемпионатының екі дүркін жеңімпазы өзбек Мир­зах­медов пен Теміртас Жү­сіпов соңғы рет осы жылдың сәуір айында Ресейдің Санкт-Пе­тер­бург қаласында өткен Губер­на­тор кубогының финалында кез­десіп, бәсеке Нодиржонның жеңі­сімен аяқталған болатын. Міне, араға санаулы айлар салып екі боксшының жолы әлем чем­пионатының ширек финалында қайта түйісті. Сондай-ақ бұл – Теміртас үшін есе қайтаратын тама­ша мүмкіндік. Екі боксшы ара­сындағы кездесу 2 қарашаға жоспарланған.

Сондай-ақ чемпионаттағы алғашқы жекпе-жектерін өткізген Сабырхан Махмұд (54 кг), Самат­әлі Төлтаев (60 кг), Санатәлі Төл­таев (63,5 кг), Нұрбек Оралбай (80 кг) және Айбек Оралбай (92 кг) да біріншілікті сәтті бастады. Был­тыр 52 кг салмақта ел чемпионы атанған Сабырхан әлем чемпионатындағы алғашқы кездесуін оңтүстіккореялық Ким Ин Гюмен өткізіп, 5:0 есебімен басым түсті.

Ал ағайынды Төлтаевтардың үлкені Саматәлі (60 кг) тайландтық Хунатип Пидунчті 3:2 есебімен тізе бүктірсе, Санатәлі (63,5 кг) молдовалық Василий Чеботарьды 5:0 есебімен жеңді.

Сонымен қатар ағайынды Орал­­байлар да алғашқы жеңіс­те­ріне қол жеткізді. 92 кг-да өнер көр­сететін Айбек поляк боксшысы Матеуш Березницкийден 4:1 есе­бімен басым түссе, Нұрбек бра­­­зилиялық Исаяса Фильоны еліне қай­тарды. Қорытынды есеп – 5:0.

Әлем біріншілігіндегі екінші жекпе-жегін өткізген Асланбек Шымбергенов (71 кг) Рио Олим­пиадасының финалисі өзбек­стандық Шахрам Гиясовты ай­қын басымдықпен жеңіп (5:0!), тур­нирдің келесі айналымына жолдама алды. 75 кг салмақ дә­режесінде жұдырықтасып жатқан Нұрқанат Райыс та өз мықтылығын дәлелдеуде. 21 жас­­тағы отандасымыз екінші ай­на­лымда молдовалық Влад Гаври­люкпен кездесіп, төре­шілер­дің шешімі бойынша 4:1 есебімен жеңіске жетті.

Ұлттық құрама капитаны, екі әлем чемпионатының қола жүл­дегері Абылайхан Жүсіпов (67 кг) жанкүйерлерге «Машина» лақап атымен танымал Венесуэла өкілі Кристиан Паласионы жарыс жолынан ығыстырды. Ал 57 кг-да жұдырықтасатын Серік Теміржанов жуырда ғана Поль­шада өткен жас­тар арасын­дағы әлем чемпионатында топ жарған жапониялық Рейто Цуцу­миден басым түсті. Бұл жекпе-жекте Цуцуми жерлесімізге еш қар­сы­лық көрсете алмады. Қайта Темір­жан жапониялық боксшыға шағын шеберлік сабағын өткізді десе де болады.

Өкінішке қарай, әлем чемпио­натының кезекті жарыс күнінде екінші боксшымыз біріншіліктен шығып қалды. Екі әлем чем­пио­натының күміс жүлдегері, Токио Олимпиадасының қола жүл­дегері Қамшыбек Қоңқабаев­тың ізбасары саналған аса ауыр салмақтағы Нұрлан Сапарбай алғашқы жекпе-жегінде испа­ниялық Аюба Гадфы Дрисстің осал тұсын таба алмады. Жерле­сіміз төрешілердің аралас шешімі бойынша қарсыласынан жеңіліп қалды. Осылайша, чемпио­наттың алғашқы аптасында екі бокс­шымыз әлем чемпионатын ерте аяқ­тады.

Дегенмен жексенбі күнгі жағ­дай бойынша Қазақстан құра­масының 11 боксшысы жарыс жолын жалғастыруда. Бұл – әзірше, чемпионаттағы ең үздік нәтиже.