Бүгінге дейін кәсіби шаршы алаңда үш кездесу өткізіп, оның барлығында нокаутпен жеңіске жеткен жерлесіміз ең кейінгі айқасында WBC International белбеуін иеленген болатын. Осындай айшықты жеңісінің арқасында барша жанкүйер жұртқа чемпиондық үмітті сыйлаған Тұрсынбай кәсіпқой бокстағы небәрі төртінші кездесуінде жеңіліп қалды.
Ұлыбритания астанасы – Лондондағы York Hall аренасында өткен бокс кешінде отандасымыз доминикандық Хуан Карлос Абреумен (24-6-1, 22 КО) қолғап түйістірді. Кездесу он раундқа жоспарланғанымен, жекпе-жек 7-ранудта өз мәресіне жетті. Кездесу бел ортасынан ауған шақта доминикандық боксшы әуелі Құлахметті нокдаунға түсіріп, іле-шала ауыр соққысымен сұлатып салды. Сөйтіп Тұрсынбай Құлахмет кәсіпқой карьерасындағы алғашқы жеңілісіне ұшырап, өзіне тиесілі WBC International титулынан да айырылып қалды.
