Иә 123 жылдан бері үздіксіз білім беріп келе жатқан Ахмет Байтұрсынов атындағы №1 мектеп-лицейінен түлеп ұшқан елімізге танымал, абыройлы азаматтар көп.
Солардың бірі Түркістан қаласының құрметті азаматы, батагөй, абыз-ақсақал Әбдібек қажы Бейсеновтің осы мектепті бітіргеніне 66 жыл толыпты. Бір қызығы мектептің сыныбы да 66 болып шықты. Биылғы жылы мектепке тұңғыш қадам басқан оқушылар білім алатын бір сыныпты Бейсеновтер әулеті түгелдей жарақтандырып берген. Әбдібек қажы мен Ұлпатша әже 10 перзентінен 36 немере, 40 шөбере сүйіп отыр. Ақсақалдың отбасы «Аялы алақаны ақ әженің», «Үлгілі отбасы» атты байқаулардың бас жүлдесін иемденсе, абыз атаның өзі республикалық деңгейде өткізілген «Батаменен ел көгерер...» байқауларында Нартай және Молда Мұса атындағы номинацияларды жеңіп алды. Кіші ұлы Әлжан қажы да әке жолын басып, өткен жылы облыс бойынша батагөйлер байқауында бас жүлдені иеленді. Ақсақалдың өлеңдері мен ой-пікірлері, қоғамдағы мәселелер туралы мақалалары республикалық, облыстық деңгейдегі газет-журналдарда жарияланған.
Күні кеше өмірі өнеге Әбдібек Бейсеновтің атына мектептен бастауыш сынып кабинетінің ашылу салтанаты өткізілді. Жиынға облыстық және қалалық білім саласының басшылары, зиялы қауым өкілдері, ұлағатты ұстаздар мен журналистер қатысып, жүрекжарды лебіздерін жеткізді.
ТҮРКІСТАН
