Клубтар арасындағы ең беделді турнирдің негізгі кезеңіне – 18 рет, элиталы сатысына 15 мәрте шыққан Алматының «Қайраты» биылғы додада Ресейдің «Тюмень», Беларусьтің «ВитЭн» және Францияның «Аньер-Вильнев» командаларымен А тобында ойнайтын болды. Топтағы матчтар Ресейде өтеді. Жанкүйерлердің есінде болса, «Қайрат» Чемпиондар лигасының негізгі кезеңінде «Тюмень» клубымен кездесіп, 3:3 есебімен тең түскен-ді. Ал «Аньер-Вильнев» жарыстың аталған сатысында қазақстандық «Атырауды» 6:0 есебімен жеңген болатын.
Сонымен қатар элиталы кезеңнің В тобында «Спортинг» (Португалия), «Ховокубо» (Нидерланд), «Олмиссум» (Хорватия), «Синара» (Ресей); С тобында «Пльзень» (Чехия), «Добовец» (Словакия), «Халле-Гооик» (Бельгия), «Барселона» (Испания) және D тобында «Бенфика» (Португалия), «Ураган» (Украина), «Халадаш» (Мажарстан), «Леванте» (Испания) командалары сынға түседі. Бұл кезеңнің ойындары 30 қараша мен 5 желтоқсан аралығында өтеді. Финалға әр топтың жеңімпазы ғана жолдама алады.
