Әкесінің бизнесі үшін баласын ұрлады

Алматы қаласында әкесінің бизнесі үшін баласын ұрлаған 4 күдікті қолға түсті. Бұл туралы «Қазақстан» телеарнасы хабарлады. Күдіктілер ұрлап кеткен бала Бостандық ауданына қарасты Алмагүл шағын ауданында тұрады екен. Баланы таңертең такси тоқтатып тұрған жерінен алдап, алып кетеді. Тергеу барысында айыпкерлер кәсіпкердің шағын бизнесі үшін баласын ұрлағанын мойындады. Олар жасөспірімді жалдамалы пәтерде ұстап, оны бостандыққа шығару үшін ата-анасынан 150 мың доллар талап еткен. Сол бойда ата-ана полиция бөліміне шағым түсіреді. «Ұйымдасқан қылмысқа қарсы күрес басқармасының «Арлан» арнайы жасағы қызметкерлері екі күдіктіні қылмыс жасалған күні қолға түсірді. Ал олармен бірге болған екі күдікті де ізінше ұсталды», - дейді Алматы қалалық ішкі істер департаментінің баспасөз хатшысы Салтанат Әзірбек. Күдіктілердің барлығы  еш жерде жұмыс істемейді және бұрын сотталмаған. Қылмыстық іс қозғалып, тергеу амалдары жүргізілуде. Әмірхан Алмағанбетов. Дереккөз: «Қазақстан» телеарнасы. Фото: «Қазақстан» телеарнасы.