Бокс • 15 Қараша, 2021

Головкин Муратамен жұдырықтасады

30 рет көрсетілді

Кәсіпқой бокстағы Қазақстанның шоқжұлдызы, орта салмақтағы IBF және IBO тұжырымдары бойынша әлем чемпионы Геннадий Головкин (41-1-1, 36 КО) дәл осы салмақ дәрежесіндегі WBA Super белбеуінің иегері жапониялық Риота Муратамен (16-2, 13 КО) жыл соңында жекпе-жек өткізетінін ресми түрде мәлімдеді. Орта салмақтың үш белбеуі үшін болатын айқас 29 желтоқсанда Жапонияның Сайтама қаласындағы 37 мың жанкүйер сыятын Saitama Super Arena спорт кешенінде өтеді.

Головкин-Мурата арасын­дағы жекпе-жек бұған дейін түрлі БАҚ-та желтоқсанда өтеді деп хабарланғанымен, бокс­шылардың өздері, олардың про­моутерлері, тіпті кездесуді тіке­лей эфирде ұсынатын DAZN платформасы да ресми мәлім­демеген еді. Дегенмен өткен ап­таның соңында екі бокс­шы да өздерінің әлеуметтік же­лі­дегі парақшаларында айқас­тың нақты уақыты мен өтетін жерін жанкүйерлерге жариялады.

Жекпе-жек ресми хабарланған күні екі былғары қолғап шебері өздерінің алдағы кездесу туралы ойларын ортаға салды.

Геннадий Головкин: «Жа­пониядағы жан­күйерлеріме ке­зекті Big Drama Show-ды ұсы­натыныма қуаныштымын. Бұл елде бокс өте танымал спорт түрі саналады. Мурата – мықты чем­пион. Бұл – екі боксшы үшін де керемет бокс кеші болады деп үміттенемін. Өйткені ортаға екеуміздің де чемпиондық белдігіміз бәске тігіледі. Бокс жанкүйерлеріне тамаша жекпе-жек ұсынамыз».

Риота Мурата: «Менің әуес­­­қой және кәсіпқой бокс­та өткізген жекпе-жектерімнің бәрі Геннадий Головкинмен бо­латын айқасқа дейінгі дайын­дық жұмыстары болды деп есеп­теймін. Себебі, дәл осы кездесу менің орта салмақ пен бокс тарихындағы орнымды айқындап бермек. Головкин – ұзақ уақыт орта салмақтың көшін ұстаған тәжірибелі боксшы. Мен үшін ол әлі жеңілген жоқ. Оған деген құрметім ерекше.

Пандемия салдарынан ең кейінгі айқа­сымды осыдан екі жыл бұрын өткіздім. Бірақ маған бұл екі жылдық үзіліс жемісті болды. Осы уақыт аралығында физикалық жағдайым мен соқ­­қымның күшін арттырып, бапкерлермен қарқынды жат­тығу өткіздік. Осындай айқас Жа­по­нияда өтетініне қуаныш­тымын. Мен үшін бұл – үлкен құрмет».

Геннадий Головкин  кейінгі жекпе-жегін былтырғы желтоқ­санда польшалық Камил Ше­ре­метамен өткізген болатын. АҚШ-тың Флорида шта­тындағы Seminole Hard Rock Hotel & Casino аренасында ұйым­дас­тырылған айқаста отан­дасымыз қарсыласын жетінші раундта техникалық нокаутпен жеңген еді.

Ал Риота Мурата болса, соңғы рет шаршы алаңға 2019 жылдың желтоқсанында көтерілді. Сол жылы ол канадалық Стивен Бат­лермен (28-1-1) өз елінде жұ­дырықтасып, бесінші раундта техникалық нокаут­пен басым түскен.

Соңғы жаңалықтар

Доллар аздап қымбаттады

Қаржы • Бүгін, 11:30

Рыбакина Диасты ұтты

Теннис • Бүгін, 08:43

Ұқсас жаңалықтар