Облыс аумағындағы автомобиль жолдарының жалпы ұзындығы – 3 397 шақырым. Оның 1 016 шақырымы – республикалық, 557 шақырымы – облыстық, қалғаны аудандық маңызы бар автомобиль жолдары. Облыстық жолаушылар көлігі және автомобиль жолдары басқармасы басшысының орынбасары Қайрат Әбсұлтановтың айтуынша, 2019 жылы ел Үкіметінің қаулысымен бекітілген инфрақұрылымды дамытудың «Нұрлы жол – 2020-2025» мемлекеттік бағдарламасы аясындағы 7 жаңа ақылы жол учаскесіне биыл өңір аумағынан өтетін республикалық маңызы бар 812 шақырымдық автомобиль жолы қосылады. Онда автомобильаралық бақылау аркалары орнатылып, жүйені пайдаланушыларға қызмет көрсететін орталықтар ашылды.
Ақылы жүйеге енгізілген автомобиль жолдарында «Ашық» жүйесі қолданылмақ. Сондай-ақ көліктердің өтуі арнайы бейнекамералар және арнайы жабдықтардың көмегімен бақылау аркаларына бекітілген.
«ҚазАвтоЖол» ҰК» АҚ облыстық филиалы директорының орынбасары Шанжархан Мырзабай инфрақұрылымды дамытудың «Нұрлы жол 2020-2025» мемлекеттік бағдарламасы шеңберінде еліміздегі 11 мың шақырымды құрайтын автожол ақылы жүйеге ауысатынын атап өтті. Ақылы учаскені пайдалануға енгізу туралы бұйрыққа қол қойылған. Соған сәйкес, І техникалық санаттағы учаскелердегі «Шымкент – Қызылорда», «Нұр-Сұлтан – Павлодар», «Шымкент – Өзбекстан шекарасы», «Щучинск – Көкшетау», «Қапшағай – Талдықорған», «Шымкент – Тараз», «Тараз – Қайнар» бағыттарына ақылы жүйе 15 қарашадан бастап енгізіледі.
Қызылорда облысы
