Тәуелсіздіктің 30 жылдығы • 18 Қараша, 2021

Тәуелсіздігіміздің жарқын жеңісі

Біздің мемлекеттік тәуелсіздікке қол жеткізген күнімізге дейінгі саяси, құқықтық жағдайымызды бүгінгі жас ұрпақ біле бермейтіні белгілі. Тіпті сол жылдарды кейбір аға ұрпақ өкілдерінің өздері ұмытыңқырап бара жатқаны да жасырын емес. Мемлекеттік тәуелсіздік елімізге түбегейлі өзгерістер алып келді. Өзгерістер жасайтын мүмкіндіктер туды. Бірақ ол өзгерістер өз-өзінен бола қойған жоқ. Мәселе сол өзгерістерді қалай пайдалана алғанымызда.

Egemen Qazaqstan

Мемлекеттік тәуелсіздігімізді жария еттік. Ендігі жерде мемлекет құрлысы, халықтың тұрмысы, бүкіл тыныс-тіршілігі, қауіпсіздігі, қорғанысы, дүниежүзілік қауымдастықпен қарым-қатынасы, ішкі-сыртқы саясаты, тағы да басқа маңызды бағыттар бойынша қандай жолмен ұйымдасып, қандай реформаларға жұмылу қажет деген сұраққа жауап іздегенде, әрине, мыңдаған отандасымыз, ең алдымен, Елбасы – Тұңғыш Президент Нұрсұлтан Әбішұлы Назарбаевтың мемлекеттік, қайраткерлік еңбегін айту әділдік болса керек.

ХХ ғасырда халқымыз басынан өткерген саяси қуғын-сүргін, ашаршылықтар салдарынан әлемнің 40-тан астам еліне шашырап кеткен қазақ баласын елге қайтару Тәуелсіздігіміздің бірінші күнінен бастап Тұңғыш Президентіміздің, Үкіметтің басты назарында болды. Бұрынғы, яғни 70 жылдан астам уақытта шетелдегі қазақтармен қарым-қатынасымыз үзіліп қалған еді. Сол аласапыран кездің өзінде шетелдегі қандастарымызбен қарым-қатынас орнатып, олардың елге қайтам дегендеріне мейлінше жағдай жасау тапсырмалары құзырлы органдарға міндеттелді. 1992 жылдың күзінде Елбасы Нұрсұлтан Назарбаевтың бастамасымен Алматы қаласында Дүниежүзілік қазақтардың І құрылтайы өткізіліп, оған шетелдерден 2 мыңға жуық қандас жиналып, шын мәнінде рухани, саяси бостандықты сезіндік.

Міне, қазақтың ұлы көші сол жылдары, осыдан 30 жыл бұрын басталып еді. Тәуелсіздігіміздің арқасында ел мен ел қосылып, ежелгі қазақ жері жаңа дәуірдің құт мекеніне айналып отыр. Ол көш өзінің керуенін жылдан жылға өсіріп келеді. Өйткені адамдардың көші-қоны – үнемі жалғастықтағы құбылыс. Тәуелсіздік дәуірінде қазақ жеріне шетелдерден 1 миллионнан астам қандасымыз тұрақты келіп, орнықса да болашақ тағдырын атамекенімен байланыстыру арманы келген бауырлардан бірнеше есе көп сыртта жүрген бауырлардың арманы екені де айғақ. Бұл сөз жоқ, біздің қазақ халқының ұлттық мемлекеттік тәуелсіздігіміздің жарқын жеңісі.

Қуаныш СҰЛТАНОВ,

Қазақстанның еңбек сіңірген қайраткері

Күннің маңызды және өзекті жаңалықтарын «Егемен Қазақстан» телеграм каналынан оқыңыз