Алматыда колледж директоры сотталды

Алматы қаласында «қаржы полицейлерінен қашамын» деп екінші қабаттан секірген колледж директорына қатысты сот үкімі шықты. Бұл туралы «Жетінші арна» хабарлады. Осы шаһардағы Сервис және технологиялар колледжін 8 жыл басқарған Маран Тақабаевқа «пара алды, қызмет бабын асыра пайдаланды және бюджет қаржысын жымқырды» деген айып тағылған болатын. «Сот Қылмыстық Кодекстің 311-бабы, 1-бөлігі бойынша айыпталған Маран Тақабаевты 3 жылға бас бостандығынан айырып, дүние мүлкін тәркілеуге үкім шығарды. Жазасын жалпы режимдегі түзеу колониясында өтесін. Сондай-ақ ол бес жылға дейін мемлекеттік қызметтен шеттетілсін», - деді үкімді оқыған судья Людмила Бектемірова. М. Тақабаевқа Қылмыстық кодекстегі екі бап бойынша тағылған айыптардың дәлел-дәйегі жеткіліксіз болғандықтан, сот оны істен бөліп алып, қосымша тергеуге жіберді. Онда  бюджеттің 16 млн. теңгесі талан-таражға түскені көрсетілген болатын. Әмірхан Алмағанбетов. Дереккөз: «Жетінші арна». Фото: Infosmi.net.