Бұл – сарабдал саясаттың нәтижесі

Мемлекет басшысы Нұрсұлтан Назарбаевтың атына Ин­гушетия Республикасының басшысы Юнус-Бек Ев­ку­ров­тан хат келді, деп хабарлады Президенттің баспасөз қызметі. Өз хатында Ю.Евкуров ингуштердің сан ғасырлық тарихындағы қасіретті датаның бірі 1944 жылғы 23 ақпан екенін атап өткен. Бұл күні ингуш халқы аяқ астынан тарихи отанынан айырылды, ал жаппай жер аудару мен қуғын-сүргін салдарынан жартысынан астамы қаза болды. «Қазақстанның мыңдаған қарапайым тұрғындары біздің халқымыздың сол мүлде адам төзгісіз жағдайда аман қалуына көмектесті. Олар жан күйзелісімізге ортақтасты, баспанасы мен нанын бөлісті, науқастарды емдеп, қайтыс болғандарды жерледі», – делінген хатта. Ю.Евкуров ингуштер үшін Қазақстан екінші отанға айналғанын және көпшілігі әлі де осы елде тұрып жатқанын, оның толыққанды азаматы болып саналатынын атап көрсеткен. Ол осының бәрі Нұрсұлтан Назарбаев жүргізген саясаттың арқасында мүмкін болғанына тоқталған. «Ингушетия Республикасы халқының және жеке өзімнің атымнан барша қазақ халқына қиын-қыстау жылдары өз ота­нынан айырылған адамдарға көрсеткен көмегі үшін шынайы ризашылық білдіремін», делінген хатта. Соңында Ю.Евкуров Қазақстан Президентіне және еліміздің барша көпұлтты халқына бақыт, жақсылық, игілік және бақ-береке тілеген.