Саябаққа қанша қаржы көмілген?

Қазір бір жақсы іс бітіп,  жұрт қуанса,  соның артынан  ши шығатыны жиі кездесіп жүр. Алайда,  оған жұрттың, қарапайым жандардың  қатысы болмайды. Ши сол істің айналасында жүргендерден  шы­­ғады. Өткен жылы жазда  Қос­танай қаласын айналып  ағып жатқан  Тобыл өзенінің бір иіні­нен  қостанайлықтар мен қала қонақтары  демалатын  саябақ  салынған еді. Оның ашылу салтанаты отшашумен аталып өткен болатын. Бірақ Тобылдың  сол жағалауында адамдардың  көзін қарықтырып тек от шашу емес, ақша шашу да болған екен.  Облыстық қаржы полиция­сы  қызметкерлері «Қостанай қала­лық мәдениет және демалыс саябағы» мемлекеттік ком­муналдық кәсіп­орнының директоры Андрей Толпинскийді тұтқындады. Оған өзінің лауа­зымдық  қызметін  асыра пайдаланды, қызмет бабын пайдаланып, жалған құжат жасады деген айып тағылып отыр. Сол саябақтың шала-шарпы аяқталған  жұмысына А.Тол­пинский 21 миллион қар­жы жұм­салды деп  жалған акт көрсеткен. Осын­ша  қаржы  ол басқаратын  мемлекеттік коммуналдық кәсіп­орынның есепшотына  аударылып та кеткен. Ал тексере келгенде, саябақтағы атқарылған жұ­мыстың  көлемі 721 мың тең­геден аспаған. Мемлекет 20 миллион теңге зиян  шеккен. Қазір іс одан  әрі тексерілу үстінде. Айт­пақшы, биыл дәл сондай саябақ Тобылдың оң  қапталынан түспек. Онда қанша  миллион суға батарын кім білсін? Нәзира ЖӘРІМБЕТОВА, «Егемен Қазақстан». ҚОСТАНАЙ.