АҚШ-тың Лас-Вегас қаласындағы Michelob ULTRA Arena-да өткен бокс кешінде шаршы алаңға көтерілген Жәнібек Әлімханұлы орта салмақтағы бұрынғы әлем чемпионы, шыққан тегі камерундық, бірақ Франция азаматтығын алған Хассан Н’Дам Н’Жикаммен жұдырықтасып, 8-раундта техникалық нокаутпен жеңіске жетті.
Кездесу бастала сала ринг қожайыны кім екенін аңғартқан отандасымыз ардагер боксшыны «ә» дегеннен абдыратып қойды. Шаршы алаңның бұрыш-бұрышына қашып жүріп жұдырықтасқан Хассан қалай соққы жасаймын деп емес, раунд бойы қалай қорғансам екен деп бас қатырумен болды. Рингте өзін еркін сезінген Жәнібек үшінші раундта бұрышқа қарай ұмтыла берген қарсыласын ортаға шақырып, жігіттерше айқасуды ұсынды. Ашық бокс кезінде тәуір соққы жасайтын қандасымыз оңтайлы сәтті тиімді пайдаланып, франциялық боксшыны нокдаунға жіберді. Тез есін жиып үлгерген Хассан төрешіге кездесуді әрі қарай жалғастыруға ниетті екенін айтты.
Қарсыласының әлеуеті белгілі болғаннан кейін Жәнібек жойқын соққыларын азайтып, жанкүйерлер үшін жекпе-жекті созуға тырысты. Бірақ Хассанның шамасы тек 8-раундқа дейін жетті. Бұл үш минуттықта Н’Жикамның мұрнынан қан, аяғынан әл кете бастаған еді. Соны байқаған төреші Жәнібектің кезекті сериялы соққысынан кейін жекпе-жекті тоқтатуға мәжбүр болды. Техникалық нокаут!
Осылайша, 28 жастағы қазақстандық боксшы кәсіпқой бокстағы 11-жеңісіне қол жеткізіп, өзіне тиесілі WBO Global белбеуін сәтті қорғады. Сонымен қатар Жәнібек WBC Continental титулының иегері саналады. 37 жастағы Н’Жикам осымен алтыншы мәрте жеңілді.
Ал Германияның Гамбург қаласында өткен бокс кешінде өнер көрсеткен ауыр салмақтағы қазақстандық Жан Кособуцкий де доминикандық қарсыласы Алексис Гарсияны техникалық нокаутпен жеңді. Он раундқа есептелген айқас бесінші раундта аяқталды. Отандасымыз алғаш А.Гарсияны төртінші раундта нокдаунға түсірсе, бесінші раундта техникалық нокаутпен жеңді.
Бұған дейін WBA International титулына ие болған Кособуцкий осы жеңісінің арқасында WBC International Silver белбеуін де иеленді.
