Жамбылды дәріптеген жастар

Мәдениет және спорт минис­тр­лігінің бастамасымен қанат қаққан жоба ел аймақтарынан келген жиырмаға тарта жас музыкантты Алматыға шақырды. Олардың ішінде жеке орындау­шылармен қатар өнер топтары да бар. Өнерге енді қадам бас­қан жас музыканттар «Жыр алыбы – Жамбыл» республикалық фес­­тивалінде өнер көрсетіп, көп­шіліктің алғысына бөленді. Ақын туған мекенге аңсары ауып келген жеткіншектер ең алды­мен Достық даңғылы­ның бойындағы Жамбыл ата ескерт­кішіне гүл шоқтарын қо­йып, рухына тағзым етті.

– Жаңа жоба отандық хип-хоп индустриясының ең үз­дік та­лантты өкілдерін бір шығар­ма­шылық алаңда тоғыстырып отыр. Қатысушылар Instagram, YouTube, Facebook әлеуметтік же­лілері арқылы іріктелді. Ірік­теу кезінде өнерпаздардың әр­тістік шеберлігіне, сөз сапта­уына, мәтін идеясының ерек­­шелігіне, вокалдық қабі­лет­те­ріне баса мән берілді. Қа­ты­сушылар арасында Қазақстан хал­қы Ассам­блеясының этно­мәдени бір­лестіктері өкілде­рі: орыс, беларусь, өзбек, ұйғыр және басқа этностар бар. Жо­баның мақсаты – Жамбыл мұ­расын насихаттай отырып, жас таланттарды қолдау әрі ел аймақтары арасында кәсіби-шығармашылық байланысты нығайту. Басқа өңірлерден келген жастар үшін Алатау баурайы Жамбыл ақын туған мекен ретінде ыстық. Сондықтан фес­тиваль қатысушыларын ақын ескерткішіне әкелдік, – дейді жобаны үйлестірушілердің бірі Сәуле Исабекова.

Ұйымдастырушылардың ай­туын­ша, кезінде Жамбыл жыр­лаған өзекті тақырыптарды бү­гінде қазақстандық жас рэперлер көтеріп, жаңа формат­та ұсынуда. Сондықтан ақынның туындылары әлі күнге дейін өзек­тілігін жоғалтпады. Жоба аясында жас­­тар арасында танымал Kyle Ruh, Ziruza, Ray, Nei1tron, Madi Rymbaev, Soulbirkez, Esko сынды жас­тар өнер көрсетіп, өнердегі өз жетіс­тіктерімен бөлісті.

 Халық поэзиясындағы жаңа өрлеу Жамбыл поэзиясымен ты­ғыз байланысты. Алматыда ақын шығармашылығына жас­тардың ынтасын оятып, қызы­ғушылығын арттыруды, жыр алыбының баға жетпес ұлт­тық мұрасы арқылы халықтың ру­хани деңгейін дамытуды көз­деген ауқымды жобалар жыл ба­сынан бері жалғасуда. Өнер өкіл­дерінің қатысуымен ұлы ақынның туындыларын му­зыкалық-поэтикалық және театр­ландырылған іс-шаралар форматында ұсынған жобалар көпшіліктің ықыласына бөленді.

Айталық, Ә.Қастеев атын­дағы өнер музейінде «Бақыт туралы жыр» атты мерейтойлық көрме есік ашып, ғибратты ғұ­мыр иесінің өмір өрнегінен сыр шертетін көрмеге өнер музе­йінің қорында сақталған 30-дан астам кескіндемелік, гра­фикалық және мүсіндік туын­ды қойылған болатын. Со­ны­мен бірге ақын есімін иемденген Жамбыл атындағы Қазақ мемлекеттік филармониясының бастамасымен бірқатар ауқым­ды іс-шара кең өріс тапты.

АЛМАТЫ