Қазына қатталған орталық

Архив мамандары үшін айтулы мерекеде Президент Қасым-Жомарт Тоқаевтың құттықтау хаты оқылды. «100 жылдық тарихында Орталық мемлекеттік архив әлемдегі ең ірі архивтердің біріне айналды, ол ең бай және қайталанбас тарихи құжаттарды біріктіре алды, өзіндік даму жолы мен ішкі дәстүрін қалыптастырды. Осы орайда архив қызметкерлерінің баға жетпес үлесі мен еңбегі лайықты бағалануға тиіс. Бұл бағытта министрлік бірқатар жұмыс атқарды. Қазақстан Рес-­
п­уб­ликасы Тәуелсіздігінің 30 жыл­дығына орай алғаш рет 100-ден астам архив қызметкері «Архив саласының үздігі» ведомстволық наградасына ие болды. Сондай-ақ 22 желтоқсанда алғаш рет кәсіби мереке «Архивші күнін» атап өтеміз», делінген құт­тықтауда.

Салтанатты шара барысында Мәдениет және спорт министрі Ақтоты Райымқұлова мұрағат мамандарын осы айтулы күнмен құттықтап, «Кез келген мемлекет үшін архив қызметінің стратегиялық маңызы бар. Ақпараттық технологияларды дамыту нәтижесінде бүгінгі таңда архив көздері ұлттық ресурстардың бірі және ұлттық бі­регейлікті тәрбиелеудің маңызды көзі екені анық. Сондай-ақ тұғыр­лы Тәуелсіздігіміздің 30 жылдығын атап өтудің негізгі тұжырымда­ма­сы жыл басында жарық көрген Мем­ле­кет басшысы Қасым-Жомарт Тоқаев­тың «Тәуелсіздік бәрінен қым­бат» мақа­ласында жан-жақты атап көр­сетілді. Осы орайда Қазақстан Республикасының Тұңғыш Президенті – Елбасы Нұрсұлтан Назар­баев архив саласы туралы: «Архив – қағаз қоймасы емес, нәр беруші кәусар бұлақ», деп атап өткен болатын. Сондықтан да бұл айтулы мереке – барша халқымыздың мерекесі», деді министр. Осы орайда ведомство басшысы бірқатар архив саласының қызметкерін «Архив саласының үздігі» төсбелгісімен және «Қазақстан Республикасының орталық мемлекеттік архивіне-100 жыл» мерейтойлық медалімен марапаттады.

Бүтіндей бір халықтың өткенін құжаттық деректермен жинақтап, ұлттың қазынасы ретінде сақтап отырған тарихи шежіре қоймасының өткені мен бүгіні жайында айтып өткен Мәдениет және спорт вице-министрі Нұрғиса Дәуешов: «Тәуелсіздіктің 30 жылдығы мен Ұлттық архивтің 100 жылдығын қа­тар атап өту еліміз тарихындағы айтулы мереке ғана емес, оның келешек ұрпақ үшін рухани құндылығы жоғары», деп атап өтсе, Орталық мемлекеттік архив директоры Сәбит Шілдебай: «Мемлекеттілігіміздің құжаттық негізі болып табылатын архив құжаттарды сақтап, ғылыми еңбектерді жариялап қана қоймай, болашақта ғылыми орталыққа айналуы керек. Алдағы уақытта осы бағытта жұмыс істеуді жоспарлап отырмыз», деп атап өтті. Ал мұнда сақталған құжаттар тарихи санасы қалыптасқан, бойында ұлттық идея­сы бар азаматтар үшін аса құнды.

Мерейтойлық іс-шара барысын­да шетелдерден алынған ар­хив құ­жаттарының көшірмелерінен даяр­ланған «Жауһар жәдігерлер» көрмесі мен архивтің 100 жылдық мерейто­йына орай жарыққа шыққан ғылыми жинақтар таныстырылды.

АЛМАТЫ