Бабалар аңсаған асыл арман

Маңғыстау өңіріне Астанадан арнайы топ келді. Түрлі министрліктердің өкілдерінен құралған топтың мақсаты – Мемлекет басшысының биылғы Жолдауын насихаттау, түсіндіру және осы орайда өз салаларында атқарылуға тиіс жұмыстар мен жоспарлар жайлы құлағдар ету. Қазақстан Республикасы Дін істері агенттігінің төрағасы М.Әзіл­ханов бастаған делегация Ақ­тау­ға келісімен өзара бөлініп, Маң­ғыс­тау облысының Маңғыстау, Қарақия және Мұнайлы аудан­дарының ауылдарын аралап, жұрт­шылықпен кездесті. Мұ­най­лыдағы «Қазақстан темір жолы» АҚ, Қа­рақиядағы «Ерсай» ЖШС, Ақ­тау қаласындағы «Қазақтелеком» АҚ, Ақтау халықаралық теңіз-сау­да порты, Ш.Есенов атындағы КМТжИУ ұжымы, білім беру сала­сы қызметкерлерімен кез­десіп, Жол­дау жайлы ой өрбітті, «Мәң­гілік Ел» идеясының негі­зін түсініп, өмір­шең­дігі үшін атса­лысуға әрбір қазақтың атсалысуы тиіс екенін айтты. – Жыл сайынғы Жолдаулардың әрқайсысының өзінің арқалаған жүгі мен жауапкершілігі бар. Тәуел­сіз еліміздің берік болашағы үшін жасалуы тиіс жұмыстарды ай­қын көрсетіп, қадау-қадау тап­сыр­маларды екшеп беретін бұл құ­жат­тар – біздің егемен елі­міз­ді келешекке бастап келеді. Эко­номикалық-әлеуметтік тұрғыдағы басым бағыттар мен бағдарларды, түрлі қолдауларды айтпағанда, биылғы Жолдаудың ең басты  ерекшелігі – «Мәңгілік Ел» идея­сы­ның ұсынылуы болды. Бұл біз­дердің бабаларымыз аңсаған арман, идея біздің заманымызда айтылды, қызығын көретін болашақ ұрпақ. Елбасы Жолдауының мақ­саты бүгінді ғана емес, бола­шақ­ты бағамдауға, күніне мың түрлі құбылып, күтпеген жаңа­лық­тар мен өзгерістер туындап жатқан әлем елдері арасынан өз орнымызды ойып тұрып алуға ұмтылдырады, – деген еліміздің Білім және ғылым вице-министрі Т.Балықбаев Ақтаудағы Ш.Есенов атындағы КМТжИУ студенттері мен оқытушылық-профессорлық құрамы алдында министрліктің Жолдауды жүзеге асыру бағы­тындағы жұмыстары туралы әңгімеледі. Делегация басшысы М.Әзілханов облыстағы Бекет ата мешітінде, орыс православие шіркеуінде болып, аймақтағы бірқатар басқармалар басшыларымен жүздесті. Өңірде теолог мамандардың жетіспейтіндігін біліп, халыққа діни насихат жүр­гізудегі молдалардың жауап­кершілігі туралы айтқан агенттік басшысы аймақтағы діни ахуалды тұрақты деп бағалады. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.