– Жобаның бір кезеңі микрофаунаға талдау жүргізуге арналды. Сол кезде күрделі торлы құрылымы бар ашық сұр түсті архозаврдың жоғарғы жақ сүйегінің қалдығына кезікті. Жалпы, архозаврды қолтырауындардың бастауы деуге болады. Архозавр 250-205 млн жыл бұрынғы триас кезеңіндегі бауырымен жорғалаушылар класына жатады. Жақ сүйекті Каспий маңы ойпаты үшін ерекше жәдігер дей аламыз. Өйткені Шығыс Еуропа платформасында триас кезеңіндегі архозаврлардың сүйегі көп кездеспейді. Қазір табылған сүйекті компьютерлік томография әдісімен ска-
нерлеу жүргізілді, – дейді «ҚМГ Инжиниринг» ЖШС-ның кернді талдау қызметінің басшысы Никита Пронин.
Оның айтуынша, көне жәдігерді өңдеу кезінде жақ сүйегі екені расталып отыр. Онда 12 тіс болған. Дәлірек сипаттау үшін сүйек арнайы құрылғы және құралдармен тазартылады. Содан кейін үлгі бейінді институтқа тапсырылады. Осындай сирек жәдігер микрофауна мен палеонтологияны одан әрі зерттеуге түрткі болады деп үміттенеді.
Атырау облысы
