Портреттегі парасат

Азаттық құсы аспанда самғағалы алаш баласының қиялы мұзарттармен беттесті. Өнердің керегесі кеңейіп, қалам­гер болсын, қылқалам шебері бол­сын ойын еркін жеткізіп, түйсігін тереңнен тартты. Оған осы картина дәлел бола алады.

Тәуелсіздік жайлы сөз қаузалса Елбасы, Елбасы жайлы әңгіме айтсақ, Тәуелсіздік сөзіміздің тұздығы болатыны анық. Егемендікке қол жеткізгелі бері қазақ даласында бейнелеу өнерінің майталмаңдары жаһандану дәуіріндегі Жаңа Қазақстанның келбетін сыза бастады. Бірі – шексіз ізгілікті құс қанаты талатын ұлан-ғайыр даладан іздесе, бірі – ұлттың тірегі болған тұлғалардан тапты. Мәселен, оқырманға ұсынылып отырған «Ел­басы. Тұңғыш Президент Н.Ә.Назарбаев пор­треті» картинасы жеке адамның автопортреті емес, ол мұқым халықтың жүріп өткен жолының бояуы. Оны суретшінің өзі де мойындайды.

«1996 жылы Елбасы менің картиналарымды резиденциясына алдырды. Қазақтың маңдайына біткен атақты актер Асанәлі Әшімов екеуміз қабылдауында болдық. Шығармаларымды тамашалап болған соң, қолымды алып, алдағы мақсат­тарымен бөлісті. Артынан көмек­шілері Елбасының портретін салсақ деген ұсыныс тастады. Бірден іске кірісіп кеттім. Жұмысты аяқтап, сыйлық ретінде жолдадым. Елбасы көріп, риза болған екен. Көмекшілері рахметін айтты», дейді автор.

Суретшіні мемлекеттің дамуына маңызды рөл атқарған тарихи тұлғалар көптен қызықтырған екен. Содан да болар, 2014 жылы Елбасы Нұрсұлтан Назарбаевтың портретін қайта жазуды қолға алады. Осылайша, екі бірдей туынды салтанатты портрет жанрында жазылады. Бұл – екі көзқарас биігінде тұлғаға деген үлкен құрметтің жемісі. Алғашында Ұлт көшбасшысының ұлттың тізгінін енді қолға алған кезеңін берсе, екіншісінде қазақты әлемге та­ныт­­қан шағын жеткізген.

Бақсаңыз, алғашқы портретте қа­зақы компонент белсендірек көр­се­тілген. Заманауи костюмнің үс­ті­нен жамылған алтынмен кестеленген қы­зыл шапан, оюлы кілем, тау етегінде созылған астанамыз әдемі бедерленген.

Ал екінші портретте басқа детальдарды негізге алған. Фигура аспанның таза көгінде қалықтаған глобустың фо­нында жазылған. Онда шеңберде белгі­ленген Қазақстан картасы жердің бай­тақтығын жеткізеді. Сол дарқан дала­мыздың Нұрсұлтан Назарбаевтай даңқты ұлы бар екенін мақтанышпен баян­дайды. Өкінішке қарай, екінші портрет біздің қолымызға түспеді. Оны да су­ретші Елбасыға сыйлаған екен.