Желтоқсандықтар алдымен Медеу ауданында орналасқан «Жанұя» балалар үйіне барды. Мұнда дамуында ауытқушылығы бар 100-ге тарта бала тәрбиеленіп жатыр екен. Желтоқсаншы аға-апаларымен кездесуге бірнеше топтың балалары қатысты. Қалған балалар аптасына 3 рет баратын спорттық жаттығуда көрінеді. Шараға келген желтоқсаншы аға-апаларының әңгімесін ынта қойып тыңдаған балалар қызықтырған сұрақтарын қойып, ашық әңгімеге араласып отырды. Тіпті өлең оқып, ән айтқандары болды. Өзін Бориспін деп таныстырған бала қазақшаны ана тілі ретінде меңгергенімен мақтанса, Настя қазақша ән шырқады. Балаларға тәттілер, ойыншықтар, қажетті оқу құралдарын сыйлаған желтоқсаншылардың өздері де жақсы көңіл күймен тарқасты.
Ал «Перзент» отбасылық балалар үйіне барған желтоқсандықтар иманды балдырғандарды көріп тәнті болды. Кіп-кішкентай балалардың әртүрлі ұлт өкілі болса да қазақша сайрап, Құранды оқығанда риза болмайтын жан болмас сірә. Тіпті кішкене баланың оқыған Құранына риза болған арабтар Әмина апаға мешіт салып беруге келісіпті. Бүгінде мешіттің құрылысы басталған екен.
Балаларға сүйсінген желтоқсаншы Әріп Қабланов: «Кішкентай баланың оқыған Құранына көңілім толқып, көзіме жас алдым. Біздің қоғамда мұндай тастанды балалар болмауы тиіс қой. Өкінішке қарай бар болып тұр. Әмина апаның сонша баланы бауырына басып, иманды етіп тәрбиелеп отырғаны – үлкен ерлік. Олар бізден емес, біз олардан тағылым алып қайтқандаймыз», деген ризалығын білдірді.
Тағылымды шараларды Алматы қаласы қоғамдық даму басқармасының қолдауымен Халықаралық «Жанашыр» қоғамдық қоры ұйымдастырды.
АЛМАТЫ
