Пікір • 08 Желтоқсан, 2021

Елбасы аманаты

110 рет көрсетілді

Елбасының «Тәуелсіздік тағылымы» мақаласын оқып отырып, толғаныстарына тебіреніп, бірге сұхбат құрғандай әсерде болдым. Бостандық пен азаттықты аңсаған қазақ мемлекетін құру жауапкершілігі тағдырына жазылған тұлғаның бұл жолы халқына сырын ақтарып, толғанған күйі ерекше тебіреніспен әсер етті. Саясаттағы байсалды ұстанымның арқасында Қазақ елі өз биігін бағындырғаны ақиқат.

Өткенге ой жүгірте отырып, қоғам санасын­дағы сілкіністің заңды екеніне де келісесің. Қоғамдық сана, ұлттық намыс, отаншылдық, ұлтжандылық қасиетке ұлттың оянып, жеті­луіне жол ашылды. Өткір сын, әділдік, ақиқат бүгіннің олжасы ғана емес, сатылай жетілудің үлгісі болды.

Елбасы: «Тәуелсіздік бізге оңай келген жоқ. Алдын ала ойластырумен, зор ұйым­дас­тыру­­шылықпен, қапысыз дайындықпен келді», деді.

Ұшар шыңның басынан бетегедегіні көріп, белдеудегіні таныған, аңдысқанға айлалы, достасқанға адалдықты табандап, есесін жібермей, ел-жұртының тілегін ту еткен Елбасының жан сырын, арман-үмітіне ортақтастық. Кей сәтте еріксіз көңіл де толқыды, себебі Қазақстанның жүріп өткен жолы, шыққан биігі тарихқа айналды. Ел тәуелсіздігін алған­дағы алғашқы атой салған сезім­ді бастан кешірген біздер ол кезде 27 жаста едік. Тәуелсіздік – әр қазақ баласының бойына жалындаған сенім, болашаққа үміт, арман әкелді. Сол үміт, арман алға жетелеп, жаңа мүм­кіндіктерге қол жеткізді. Ол кезді қазіргі күнмен салыстыру мүмкін де емес еді. Қарыштап дамып бара жатқан адамзат дәуірінің бұл күнде бір күнінен бір күні озып тұр. Осы кезеңде Қазақстан өз жолын таңдады, тарихи таңдауын жасады.

Елінің басынан өткен тарихи тағдырлы кезеңін сабақтай отырып, Елбасы тәуелсіз елдің болашағына сенім артыпты. Елбасы әділдік үшін ақиқат жолында өткір сынды да айтты, басын бәйгеге де тікті. Қан­дай саяси драмалар болсын, жерінің бүтіндігі, халқы­ның бейбітшілігін жанына жалау етті. Халық бейбіт жолмен дамыды, көшбасшысына сенді. Қауіпті шатқалдардан ыңғайлы жол тапты, асулардан аман өтті. Шекарасы шегенделген қазақтың Еуропа елдеріне, Парсы шығанағына, Үнді, Атлант және Тынық мұхит­қа тікелей шығу мүмкін­дігіне қол жеткізді. Қазақ­стан еуроазиялық транскон­тинентальді көлік көпіріне айналды. Адам айтса сенгісіз мұндай арманға қол жеткізу мүмкін болмастай көрінетін.

Ұлттық қор мен алтын-валюта қоры жасақталмағанда кешегі ел басына төнген қатерлі, қауіпті пандемиядан аман шыға алар ма едік. Мақалада осының барлығы тарқатылады.

Бір қарағанда қазақтың алаң­дауына себеп жоқ сияқ­ты көрінгенімен, киелі тәуел­сіздік­ті мәңгілік сақтау күрес­керлік пен жетілу­ді талап ете береді. Болашақтың үлесі де, ше­шімі де әлдеқайда салмақты болмақ. Тұт­қиылдан соғып, төте­ден қабылданған тосын ше­шімдей көрінгенімен, жүз өлшеп, бір кес­кен, мың түйіп, бір тарқатқан шешімі де та­рих­қа айналды. Елбасы «Тәуел­сіздік тағылы­мы» мақала­сында: «Отыз жылға жуық ел бас­қарған кезімде мен қанш­ама азаматты серік етіп, көпте­ген шәкірт тәрбиеледім. Солар­­дың ішінде Үкімет басқар­ған, Біріккен Ұлт­тар Ұйымы Бас хатшысының орынбаса­ры рет­інде жаһандық саясат­қа жетіктігін таныт­қан, тәуелсіз­діктің алғашқы жылдарынан бас­тап қасымнан табылған нағыз патриот, жо­ғары білік­ті кәсіпқой тұлға Қасым-Жомарт Кемел­ұлы Тоқаевты Прези­денттік қызмет­ке ұсын­дым. Сайлауда басым көпшілігі оны қол­дады. Осы­лайша біз халқымыздың ауызбір­лігін, сая­саттағы сабақтастығымызды күллі әлем қауым­дастығына тағы бір қырынан таныта білдік», дейді.

Елбасы Горбачев пен Ель­цин­ арасындағы сая­­си текетірес шегіне жеткен сол кезде Қазақ­стан тарапынан жіберілген жалғыз қателіктің өзі орны толмас трагедияға әкеліп соқтыруы әбден мүмкін екендігін көрегендікпен айтады. Саясаттың қыл көпірінен сүрінбей өткен әккі саясаткер, көшбасшы Қазақстанның тағ­дырын да, халқының тағ­дырын да: «Мен оған сенемін! Ол адал!» деп екі ауыз сөзбен түйіп айтты.

Елбасы «Алда алар асуларымыз бен бағындырар биіктеріміз де, ықтимал сын-қатерлер де аз емес» екенін де ескертеді. Иықты кеңге салар заман қай кезеңде де болған емес. Үш он жылдықты еңсерген елдің алдында аялдауды күттірмейтін, жанкешті жетілудің, өрлеу мен дамудың жаңа аңғары жол салды. Индустриялық-инно­вациялық дамудың жаңа кезе­ңі басталғанын және ол бү­гінгі жаңа буынның үлесіне тиген ұлы бетбұрыстар болатынына тоқталған. «Тәуелсіздік те ба­қыт сияқты, бағалаған адам­ның, аялаған қоғамның қолын­да тұрақтайды». Бұл – Елбасының болашаққа айтқан аманаты.

 

Роза МҰҚАНОВА,

жазушы, Мемлекеттік сыйлықтың лауреаты

Соңғы жаңалықтар

Доллар арзандады

Экономика • Бүгін, 15:50

Вакцина салдырғандар саны артты

Коронавирус • Бүгін, 09:17

Ұқсас жаңалықтар