Әйелге қамқорлық – болашаққа қамқорлық

Ал ол елімізде өз деңгейінде ме?

Халықаралық әйелдер күні қарсаңында Қазақстан Коммунистік халықтық партиясы Ұлттық баспасөз клубында «Әйелге қамқорлық – болашаққа қамқорлық» деген тақырыпта талқылау өткізіп, әйелдердің басындағы проблемаларды шешудің жолдарын ортаға салды. Шараға Парламент Мәжі­лісіндегі Халықтық коммунистер фракциясының депутаттары Жамбыл Ахметбеков пен Айқын Қоңыров және арнайы шақырылған екі жас ана қатысты. Алдымен сөз алған Ж.Ахметбеков өткен аптада партияның ұйыт­қы болуымен өңірлерде әйел­дер қауымының әлеуметтік жағ­дайына қатысты  дөңгелек үстел­дер өткенін тілге тиек етті. Бұл баспасөз мәслихаты соның қоры­тын­дысына арналғандығын алға тартқан депутат әйелдерге қам­қорлық мемлекеттің үлкен саясатының бірі болуға тиіс екенін атап көрсетті. Қазіргі таңда елімізде тұңғыш балаға төленетін ай сайынғы жәрдемақының көлемі 10186 теңгені құрайтындығын алға тартқан халықтық коммунистер еліміздегі ең төменгі өмір сүру көрсеткіші 19966 теңге екендігін қаперге салды. Бұл арада бір баланы мектепке дайындау республика бойынша 30 мың теңгені құрайтыны көлденең тартылды. Ал 2014 жылы елімізде бір жолғы мемлекеттік жәрдемақы 1, 2 және 3 балаға 55 000 теңгені құраған. Депутаттар жәрдемақыны өзге елдермен салыстыра отырып, оның мардымсыз екеніне назар аударды. Мысалы, 2013 жылғы көрсеткіш бойынша Сингапурда бір жолғы жәрдемақы – 4900, Беларусьте – 1000-1500, Ресейде 3000 доллар шамасында екен. Францияда бала туып, үш жылға декреттік демалысқа кеткен ана ай сайын 400 еуроға дейін жәрдемақы алатын көрінеді. Осылардың барлығын орта­ға салған ҚКХП депутат­тары әйелдерге қосымша жеңіл­діктер ұсынуды және бала күті­мін­де отырған аналар мен бола­шақ аналарға қаржылық көмек­тің көлемін ұлғайтуды қолдай­тын­дықтарын дәйектеуге тырысты. Олардың пікірінше, бірін­ші балаға берілетін біржолғы жәр­демақыны екі есеге көбейткен дұрыс. Сондай-ақ, Әкімшілік кодекс­ке енгізілген өзгерістер мен то­лық­тырулардың жаңа бап­тары бойынша аяғы ауыр әйелдер­ді жұмыстан шығуға мәжбүр­легендерді айыппұлмен және қызметінен төмендету жазасымен жазалау орынды болмақ. Бұдан басқа, халықтық коммунистер бала күтіміне байланысты берілетін ай сайынғы мем­лекеттік жәрдемақы мерзімін 3 жасқа дейін ұзартуды да ұсын­ды. Ж.Ахметбеков көп балалы отбасыларға да ерекше қамқор­лықтың қажеттігін алға тартты. Оның айтуынша, егер отбасында үш бала болса, онда коммуналдық қызметтің 30 пайызын өтеп берген орынды болмақ. Ал 4-5 балалы от­басыларға 50 пайыз жеңілдік беріп, 7 және одан көп балалы отбасыларды коммуналдық қыз­метке ақы төлеуден мүлдем босату керек. Баспасөз мәслихатына арнайы келген жалғызбасты ана Шарихат Иманбаеваның мәліметіне қарағ­анда, Қазақстанда 100 мың бала әке­лерінен алимент ала алмай жүр екен. Сондықтан да ол әке­лер­ге қатысты жауапкершілікті қатаң­датуды ұсынды. Жалпы, баспасөз мәслихатын өткізудегі басты мақсат әйелдердің проблемасына назар аударту болды. Асқар ТҰРАПБАЙҰЛЫ, «Егемен Қазақстан».