Әр кәсіпорын бір мүгедек жанды жұмысқа алмақ

Оңтүстік Қазақстан облы­сындағы әртүрлі деңгейдегі 30 мыңнан астам кәсіпорындар бір-бір мүмкіндігі шектеулі жанды жұмысқа қабылдап, қамқорлыққа алуды мақсат тұтып отыр. Бұл бас­таманы облыстағы кәсіп­керлер бірауыздан қолдады. Шымкентке келген сапарында Еңбек және халықты әлеуметтік қорғау министрі Тамара Дүйсенова осындай игілікті істің куәсі болды. Бүгінде Оңтүстік Қазақстан облысында еңбекке жарамды 28 мың мүгедек жан бар. Шымкент қаласында өткен мүмкіндігі шектеулі азаматтарды еңбекпен қамту мәселесіне арналған облыстық форумда барлық жұмыс берушілерге арналған үндеу қабылданды. Сонымен қатар, енді қолға алынып отырған «Бәріміз біргеміз, мықты болсын іргеміз» акциясы аясында тағдыр тәлкегіне ұшыраған азаматтарды жұмыспен қамту ісі күшейетіні айтылды. Министр бұл форум өзге өңірлерге үлгі болуы керек екенін айта келе, оңтүстікқазақстандық кәсіпкерлердің үндеуін еліміздегі 340 мыңнан астам кәсіпорын басшылары қолдайтынына сенім білдірді. Сонда ғана алға қойған мақсаттарды, мүдделерді жүзеге асыруға болады. Сондай-ақ, министр осы іске атсалысқан кәсіпкерлерге мемлекет тарапынан көмек болатынын баса айтты. «Біз кәсіпкерлерді мүмкіндігі шектеулі жандарды жұмысқа алың­дар деп қана қоймай, жұмыс­пен қамту бағдарламасы аясында қандай көмек болатынын да түсіндіріп жатырмыз. Егер кәсіп­кер­лердің қарамағында осындай жарымжан жандар жұмыс істеп жатқан болса, ол азаматтардың мамандығын көтеруге қажетті қар­жының 70 пайызын мемлекет, 30 пайызын кәсіпорындардың өздері көтереді. Дәл осылайша жұмыспен қамту бағдарламасы арқылы еңбекақысының 35 пайызын мемлекет, 65 пайызын жұмыс берушінің өзі төлеп отырады», дейді Т.Дүйсенова. Облыс әкімі Асқар Мыр­зах­метовтің айтуына қарағанда, былтыр «Жұмыспен қамтудың жол картасы-2020» бағдарламасының 2-ші бағыты бойынша шағын несие­мен қамтамасыз ету үшін 3 млрд. теңге, кәсіпкерлік негіздерінің оқы­туларына 46,6 млн. теңге бөлінген. Осы бағыттағы оқыту ұйымы ретінде облыстық «Кәсіпкерлерге қызмет көрсету орталығы» бел­гі­леніп, 2013 жылы 2 663 адамды кә­сіпкерлік негіздеріне оқытты. Облыстың шағын несиелендіру жөніндегі өкілетті өңірлік ұйымы тарапынан бағдарламаның 1 075 қатысушысына жалпы 2,5 млрд. теңге несие берілді. Бұл күні облыс орталығында өткен мүмкіндігі шектеулі азаматтарға арналған бос жұмыс орындары жәрмеңкесінде 90 жұмыс берушіден 1000-нан ас­там жұмыс орны ұсынылды. Жәр­меңкеде 252 мүгедек азамат тұ­рақты жұмысқа орналасты. Жалпы алғанда «Жұмыспен қам­тудың жол картасы-2020» бағ­дарламасын жүзеге асыру бойын­ша Оңтүстік Қазақстан облысы бірінші орында келе жатыр. Был­тыр елімізде аталған бағ­дар­лама бойынша еңбекке ара­ласқандардың 33,8 пайызын оң­түс­тікқазақстандықтардың құрауы осы сөзіміздің айқын дәлелі. Сондай-ақ, алдағы уақытта дәрі­герлер мен мұғалімдерге жала­қы олардың білім деңгейіне, білік­тілігіне, жұмыстарының қиындығы мен жауапкершілік дәрежесіне қарай төленеді. Бұл мәдениет және спорт саласының мамандарына да қатысты. Яғни дәрігер, мұғалім және әлеуметтік қызметкерлерге еңбекақы төлеу­дің жаңа жүйесі 2015 жылдың 1 шілдесінен бастап енгізіледі. Бұл жаңа жүйенің басты мақсаты – әр салада еңбек етіп жүрген негізгі қызметкерлерді анықтап, олардың еңбегін дұрыс бағалау. Өйткені, бүгінде елімізде дәрігерлер жала­қысының 38 пайызы, ал мұға­лімдер еңбекақысының 48 пайызы ғана негізгі қызметтері үшін тө­ленеді. Жалақының қалған бөлі­гін қосымша жұмыстар үшін бері­летін төлемдер құрайды. Бас­қаша айтқанда, дәрігер науқасты емдегені, мұғалім баланы оқыт­қаны үшін алатын ақысы оның барлық жалақысының жартысына да жетпейді. – Біздіңше, бұл дұрыс емес. Адамдардың еңбегі өз маман­дығы бойынша атқарған негізгі жұмысына қарап бағалануы керек. Сонда адамдар қосымша жұ­мыстармен әуестенбей, өздерінің біліктілігін арттыруға назар аударады, – деді Т.Дүйсенова. Оралхан ДӘУІТ, «Егемен Қазақстан». Оңтүстік Қазақстан облысы.