«Ордабасы Құс» ЖШС-нің тұсауы осыдан төрт жылдай бұрын Елбасымен болған тікелей телекөпірде кесілген болатын. Бұл құс кешені 2010 жылы үдемелі индустриялық-инновациялық даму бағдарламасы арқасында тірлігін өрістетті. Қазіргі таңда, «Ордабасы Құс» ЖШС 30 түрлі өнім ассортиментін шығарып отыр. Алдағы уақытта бұл көрсеткішті 100-ге дейін жеткізу жоспарлары бар. Шығарылатын өнім Оңтүстік Қазақстан, Алматы, Қарағанды, Павлодар, Қызылорда облыстары мен Алматы, Астана қалаларына сатылады. Сондай-ақ, өнімнің 20 пайызы Ресей Федерациясына экспортталады. Бұл, әрине, Кеден одағына мүше елдермен аймақаралық ынтымақтастықты дамыту арқасында мүмкін болып отыр.
Жаңа құс кешенінің бірінші сатыдағы өндірістік қуаты шамамен жылына 4800 тонна күркетауық етін шығару болған. Болашақта өндіріс қуатын 2 есе арттыру мүмкіндігі бар және ол еліміздің агроөнеркәсіп кешенін дамыту идеясына толығымен сай. Инвестициялық жоба құны 1728,9 млн. теңгені құрап, өткен жылы өндіріс көлемін ұлғайту бойынша «Тірі салмақты күркетауық еті көлемін жылына 8110 тоннаға жеткізу» жобасы жүзеге асырылды. Аталған серіктестікте қолданылып отырған озық технологиялардың арқасында жылына 150 мың балапан өсірілуде. Алдағы жылдары мұнда өсіріліп жатқан балапандардың санын 1 млн.-ға жеткізу көзделуде. Өңірімізде құс шаруашылығы өндірісін өркендету мақсатында серіктестік басшылығы 5 жылдық даму бағдарламасын да әзірлеген.
Жалпы алғанда, бұл кәсіпорынның болашағы зор. «Ордабасы Құс» ЖШС Ұлыбританияның Оксфорд қаласында Еуропалық сапа сертификатын, Париж қаласында Тәуелсіз қоғамдық сапа жөніндегі бірлестіктің алтын медалін алды. «Қазақстанның үздік тауары» деген номинацияға лайық деп табылып, қатарынан екі жыл жеңімпаз болды. Мұның барлығы, әрине, бұл кәсіпорынның шығарған өнімінің сапасына берілген баға екені анық.
Оралхан ДӘУІТ,
«Егемен Қазақстан».
Оңтүстік Қазақстан облысы.
