Атыраулық азаматқа лаңкестік ұйымды қаржыландырды деген айып тағылды

Атырау облысындағы бір азаматқа лаңкестік ұйымды қаржыландырды деген күдік келтірілді. Бұл туралы «Астана» телеарнасы хабарлады. Облыстық қаржы полициясының дерегіне жүгінсек, әлгі айыпкер  «Ислам Джихат Одағы» ұйымына алдымен 2 мың, кейін 3 мың доллар аударған көрінеді. Шетелге аталған соманы «БТА Банкі» Атырау филиалының «Western Union» банктік аударым қызметі арқылы жіберіпті. Қаржы Aзизуллах деген азаматқа жолданған екен. Осыған байланысты, күдіктіге терроризмді және экстремизмді насихаттау бабы бойынша қылмыстық іс қозғалды. «Атыраулық азаматқа банктік аударым арқылы долларды шетелге жіберу жолымен халықаралық террористік ұйымды қаржыландырды деген күдік келтірілді. Қазір осыған қатысты қылмыстық іс тергелуде. Ал өзге ақпарат тергеу мүддесіне байланысты жарияланбайды», - деді Атырау облысы бойынша экономикалық қылмысқа және сыбайлас жемқорлыққа қарсы күрес департаментінің аға тергеушісі Дулат Мадияров. Әмірхан Алмағанбетов. Дереккөз: «Астана» телеарнасы. Фото: Ria.ru.