Өңір-өңірде ел Тәуелсіздігінің 30 жылдығына арналған түрлі іс-шара ұйымдастырылуда. Осы орайда елордада Қазақстан Республикасы Қарулы Күштері Ұлттық әскери-патриоттық орталығы Орталық әскери оркестрінің солисі, Қазақстанның Еңбек сіңірген қайраткері, капитан Қайыржан Бердібайдың «Тәуелсіздік – тұғырым» атты шығармашылық концерті өтті. Қайырымдылық мақсатында өткен кешке Нұр-Сұлтан қаласының «Шарапат» Қарттар үйінен көрермендер келіп қатысты.
Кеш авторының айтуынша, қайырымдылық кешін өткізу жоспары бір кездегі Қарттар үйіндегі концерттен туындаған екен.
«Концерттің негізгі мақсаты – қарттарымыздың жүрегіне жылылық сыйлап, көңілдерін көтеру. Алдағы жылы Балалар үйінің балаларына да осындай кеш өткізсем деймін. Сол жердегі өнерлі балаларды да сахнаға шығару ойда бар. Одан бөлек мүгедек жандарға да қайырымдылық кешін өткізу жоспарда тұр», дейді әнші.
Әрбір тарихи дәуірдің өзіндік мәдениеті болатыны секілді әр халықтың өзіне тән дәстүрлері бар. Ата дәстүрден жалғасқан ұлттық аспаптық музыка халқымыз үшін ерекше орын алады. Шығармашылық кешті сүйемелдеген Еркеғали Рахмадиев атындағы мемлекеттік академиялық филармониясының Қазақ оркестрінің өнерін тамашалап отырып, осы ойға тағы да беки түсесің. Айта кетейік, оркестрдің бас дирижері – Қазақстанның Мәдениет қайраткері Нұрлан Бекенов болды.
Қайырымдылық кешінде Абай, Сәкен, Ілия Жақанов, Рудольф Фольва, Александр Зацепиннің – барлығы он сегіз ән орындалды. Айта кетейік, концертте Қазақстанның Еңбек сіңірген қайраткерлері Секен Тұрысбек, Жеңіс Ысқақова, Рамазан Стамғазиев пен Қазақстан Республикасы Қарулы Күштерінің Ұлттық әскери-патриоттық орталығы Орталық ансамблінің хоры өнер көрсетті.
«Концертті Жұбан Молдағалиевтің рухты оятатын «Мен қазақпын» әнімен бастауымның өз себебі бар. Жұбан Молдағалиев – Колбинге қарсы сөйлеген қазақтың батыр, біртуар азаматы. Бұдан бөлек орындалған барлық ән қазақ құлағына сіңген, жүрегінен орын алған шығармалар. Жалпы, алдағы ұлық мереке – ел Тәуелсіздігінің 30 жылдығы қарсаңында қазақ өнерінің інжу-маржан шығармаларына айналған әндерді халыққа ұсынып, рухын оятып, патриоттық сезім ұялататын кеш өткізе алғаныма қуаныштымын. Бұл, әрине, ең алдымен ел егемендігінің арқасы», дейді әнші.
Қайыржан Бердібайдың репертуарында Ілия Жақанов, Секен Тұрысбек, Мұқан Төлебаев, Кеңес Дүйсекеев, Исраил Сапарбай, Марат Ілиясов, Қапан Мусин сынды басқа да композиторлардың әндері, сондай-ақ шетелдік шығармалар да бар. Ол бұған дейін Абай атындағы қазақ мемлекеттік академиялық опера және балет театрында өнер көрсеткен. «Қыз Жібек» операсында Шегенің рөлінде ойнаған, сондай-ақ «Риголетто», «Травиата», «Аида» операларында шағын партияларды орындаған. Кейін әскери қызметке кеткен соң репертуарында көбінесе патриоттық әндер жиналған.
«Әскери оркестрдің солисті болғандықтан, түрлі жағдайларда ән шырқауға тура келіп жатады. Мәселен, әлем елдерінің делегациялары Қазақстанға ресми сапармен келгенде міндетті түрде сол ұлттың әндері орындалады. Сондықтан мұндай жағдайларға да әрдайым дайын жүреміз», дейді Қ.Бердібай. Сондай-ақ келесі жылы Ілия Жақановтың, Исраил Сапарбайдың, Секен Тұрысбектің шығармашылық кешін және Кеңес Дүйсекеевті еске алу кешін жоспарлап жүргенін айтты.
