![Бірқатар қазақстандықтарға «Халық алғысы» медалі табысталды](/media/2021/12/15/mio.jpg)
Осыған орай, тәуелсіздіктің 30 жылдық мерейтойы қарсаңында Отанымыздың өркендеуіне қосқан елеулі үлесі ескерілген 2 мыңға жуық азаматқа «Халық алғысы» медалі табыс етілді.
Айта кету керек, волонтер жылында еліміздің волонтерлік қызметіне қатысушылар саны үш есеге өсіп, қайырымдылықтың қарқыны арта түсті. Сондықтан бұл жолы қоғамдық белсенділік танытып, әсіресе қайырымдылық және волонтерлік қызметте еңбектенген азаматтарға басымдық берілді.
Мәселен, Шығыс Қазақстан облысының тумасы Михаил Федоров көптеген игі істердің басынан табылған. Бүгінде ол үш гектар аумақты көгалдандырумен айналысып келеді. Ауыл тұрғындары көршісін «орман сақшысы» деп атап кеткен екен.
Тағы бір үлгілі іс ретінде қуаңшылықпен күресу үшін қазақстандықтарға үндеу тастап, жаз бойы шөп шауып, жаппай мал қырылған өңірлерге жемшөп жіберген ерікті Құрмет Болатханның еңбегін атап өтуге болады.
Жеке бастамалармен қатар шағын және орта кәсіпкерлік өкілдері тарапынан қайырымдылық жасау жолындағы белсенділік жылдан жылға артып келеді. Асхат Солтанов, Василий Палаев, Қасымхан Шәріпов, Әлия Түсіпбекова және Нариман Шақабаев сияқты кәсіпкерлердің меценаттық қызметі қайырымдылықтың жарқын үлгісі десек болады. Олар ел экономикасының өсуіне үлес қосып қана қоймай, елдің әл-ауқатын арттыру бойынша жүйелі жұмыстар жүргізуде.
Еріктілік пен қайырымдылық мысалдарынан бөлек, бұл жолы денсаулық сақтау, білім беру және пандемиямен күресте әлі де алдыңғы қатарда жүрген адамдардың өмірі үшін маңызды басқа да мамандық өкілдерінің еңбегі назардан тыс қалмады.
Олардың барлығы мемлекеттік мереке қарсаңында «Халық алғысы» медалімен марапатталды.
Естеріңізге сала кетейік, 2020 жылы «Халық алғысы» медалімен 5 мыңға жуық азамат: оның ішінде дәрігерлер, еріктілер, меценаттар, мұғалімдер, полицейлер, ТЖ қызметкерлері, журналистер және т. б. марапатталған болатын.