17 кездесуде қарсыластарының барлығын нокаутпен жеңген Артур Бетербиевті сынағандар да кездесті. Олардың қатарында бұрынғы боксшылар Андре Уорд пен Тони Белью бар.
«Менің ойымша «Канело» Бетербиевті тоқтатады. Бұрыннан-ақ Артурдың кездесулеріндегі олқылықтарды байқап келемін. Тіпті «Канелоның» оны қандай соққымен құлататынын да білемін. Жартылай ауыр салмақ дәрежесінде Сауль Альварес күш жоғалтпайды. Оны Сергей Ковалевке қарсы кездесуінде көрдік. Бетербиевке қарсы да сол нәтижені қайталай алады», деді Тони Белью.
Естеріңізге сала кетейік, екінші орта салмақ дәрежесінде әлемнің абсолютті чемпионы саналатын мексикалық боксшы Сауль Альварес бірер жыл бұрын жартылай ауыр салмақ дәрежесіне көтеріліп, сол кездегі WBO чемпионы Сергей Ковалевті нокаутпен жеңген болатын. Енді Альварес жартылай ауыр салмақты қоя тұрып, бірінші ауыр салмақта әлем чемпионы атануды көздейді.
