Облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Еркебұлан Әбілқасымовтың мәліметінше, Теңіз кен орнындағы «Келешек кеңею» жобасының аяқталуына байланысты 39 мың жұмыс орнын қысқарту жоспарланып отыр.
«Бұл жобада жұмыс істейтіндердің жартысына жуығы – жергілікті тұрғындар. 2022 жылдың бірінші тоқсанында 7 мың адам қысқарады. Жұмыстан қысқарған адамдарды мемлекеттік бағдарламаларға тарту жоспары бар. Мемлекеттік бағдарламалар арқылы 12 мыңға жуық адамды жұмыспен қамту жоспарланып отыр. Мұнай-химия кешені саласында атқарылатын инвестициялық жобалардың құрылыс жұмыстарына 20 мыңға жуық халықты жұмыспен қамтылады», деді Еркебұлан Әбілқасымов
Осыған орай «Теңізшевройл» ЖШС-нің баспасөз қызметі түсінік берді.
«Қазір Теңіз кенішіндегі Келешек кеңею және Ұңғы ернеуіндегі қысымды басқару жобасын (ККЖ-ҰЕҚБЖ) жүзеге асыру жалғасып жатыр. Осы кезге дейін жоба жұмыстарының 87%-ы аяқталды. Бекітілген жоспарға сәйкес жобадан босатылған жұмыс күшін кезең-кезеңімен шығару күтіліп отыр. Осыған байланысты «Теңізшевройл» ЖШС Атырау облысының әкімдігімен, Энергетика және Еңбек және халықты әлеуметтік қорғау министрліктерімен бірлесіп ККЖ-ҰЕҚБ жобасына тартылған қызметкерлердің жоспарлы босатылуына мониторинг жүргізіп жатыр. Компания аталған жобаны іске асыру кезінде сұранысқа ие жұмысшы мамандығын игеру үшін 19 мыңнан астам адамды оқытуға және қайта оқытуға инвестиция салды. Енді олар Қазақстанда және шетелдердегі басқа өнеркәсіптік жобаларда тәжірибесі мен білімін қолдана алады», деп мәлім етті компанияның баспасөз қызметінен.
