![Министр қорықшының өліміне қатысты пікір білдірді](/media/2021/12/21/d226a996-70d6-4033-a26e-640845494ea4.jpg)
Полиция таратқан нұсқа бойынша марқұм Серік Мәженов аң аулап жүріп қайтыс болған. Бірақ марқұмның отбасы қайғылы оқиға рейд кезінде болғанын айтуда. Тіпті оны рейдке шыққаны туралы қағаз да бар екен. Аумақтық инспекцияның басқа қызметкерлері де полиция ұсынған нұсқаға сенбейтінін айтты. Олар қайғылы оқиға браконьерлерді ұстау кезінде болған деп топшылайды.
Бүгін БАҚ өкілдері Экология, геология және табиғи ресурстар министрі Серікқали Брекешевтен шын мәнінде оқиғаның қалай болғанын сұрады.
Алайда министр тергеу амалдары аяқталған кезде ғана нақты шындық белгілі болатынын айтты.
«Өкінішке қарай, осындай жағдай болды. Осы сәтті пайдаланып, қайтыс болған әріптестіміздің отбасына министрліктің атынан тағы да көңіл айтқым келеді. Бастапқы нұсқа бойынша, бұл - кездейсоқ орын алған қайғылы оқиға. Қазір тиісті органдар тергеу шараларын жүргізіп жатыр. Бүгінгі таңда бізде әзірге толық сенімді ақпарат жоқ. Тергеу қорытындысының аяқталғанын күтеміз», деді Серікқали Брекешев.