08 Мамыр, 2010

ҰРПАҚТАРЫМЫЗ ҰМЫТПАЙДЫ

595 рет
көрсетілді
4 мин
оқу үшін
Кеше Ақордада Президент Нұрсұлтан Назарбаев Отан қор­ғаушылар күніне орай  бірқатар соғыс ардагерлерін және әлеует құрылымдарының қызметкерлерін Қазақстан Республикасының мемлекеттік наградаларымен мара­паттады. Әскери погондарды табыс ету рәсімі  резиденцияның “Алтын залында”,  мемлекеттік наградаларды табыс ету  рәсімі “Мәрмәр залында” өтті. “Мен қазір жоғары әскери атақ пен шендерді тапсырғалы тұрмын. Қазақстан Қарулы Күштерінің басшылық құрамындағы бірнеше сардар бүгін генерал атағына ие болып отырғанын айрықша айтқым келеді. Қарулы Күштеріміз – бүгінде татулықты ту еткен хал­қымыздың берік қорғаны, тәуел­сіздігіміз бен тұтастығымыздың се­німді тірегі. Айбынды әскеріміз, қырағы қорғаушыларымыз бар кезде халқымыз бейбітшілік баян­ды болады деп сенеді”, деді Ел­басы әскери және арнайы шенге ие болғандарды құттықтау кезінде. Ал “Мәрмәр залға” қаз қатар қой­ыл­ған орындықтарға жүздері бал-бұл жанған ардагерлер жай­ға­сыпты. Олардың артында сымға тар­тылғандай жас офицерлер тіз­бегі тұр. Есік ашылып, Мемлекет бас­шы­сы микрофон қойылған мін­бер­ге жақындады да: “Менің Жар­лығыммен осыдан 18 жыл бұрын Қазақстан Республика­сы­ның Қарулы Күштері құрылған болатын. Біз тәуелсіздігіміздің таңы жаңадан атып келе жатқан кезде ұлттық армиямызды жасақ­тадық. Содан бері осы күнге дейін екі мейрам дәстүрге айналды. Мен бүгін мереке күніне орай елімізге еңбегі сіңген адамдарды мемле­кет­тік награда­лармен марапаттауды жөн көрдім. Жоғары марапат ие­ле­рін шын жүректен құттықтай­мын. Жеңіс мерекесі құтты бол­сын!” деді. Келесі кезекте Елбасы арда­гер­лерге қаратып былай деді: “Бүгінгі күнге дейін аман-есен жетіп, Алланың шапағатына, мемлекеттің құрметіне бөленіп отырсыздар. Соның өзі үлкен бақыт. Сіздер сұрапыл соғысты көрдіңіздер, қа­зақтың тәуелсіздігінің куәсі бол­ды­ңыздар. Сол қызықтарыңыз мо­лы­нан болсын. Әрине, мен арда­гер­лердің барлығына дерлік мем­лекеттік наградаларды тапсыра алмаймын. Сондықтан да барлық әкімдерге өңірлердегі ардагерлерге мемлекеттік наградаларды тапсыру жөнінде тапсырма берілді. Бүгінгі күні Қазақстанның қай жерінде де ардагерлерге зор құрмет пен қам­қор­лық жасалып жатыр.  Сол қам­қорлықтардың барлығы сіздердің соғыс кезінде көрсеткен ерлікте­рі­ңізге ұл-қыздарыңыздың құрметі мен сый-сыяпаты. Енді ұрпақ­тарымыз біздің буынды да сіздерді қадірлегендей қастерлесе екен дейміз. Менің ойымша,  ұрпақтар сабақтастығы, яғни баланың атаға деген құрметі осылай болуы тиіс”. Нұрсұлтан Әбішұлы өзінің үздік генералдар мен офицерлерді бейбіт уақыттағы еңбектері, жо­ға­ры біліктіліктері, Отан алдындағы қызметтері үшін мемлекеттік наг­ра­далармен марапаттағанын мә­лім­деді. Бұл ретте 19 офицерге ге­не­рал атақтары берілген болатын. Елбасы осындай марапатқа әс­ке­ри­лердің еңбектері сіңгенін атап көрсетіп, олардың ардагер­ле­рі­міз­дің ерен еңбектерін жалғастырып, солардан оқып-үйренуде екенін айтты. — Біз сіздерді Ұлы Отан соғы­сының 70, 75 жылдықтарында да көргіміз келеді, — деді Елбасы ардагерлерге. Сұрапыл соғыста 500-ден астам азаматымыз Кеңес Одағының Батыры атанды. Жауды  жұмылып, бірлі­гі­мізбен жеңдік. Қанқұйлы соғыс жылдарында қазіргі Қазақстан хал­қының мызғымас бірлігі қа­лыптасты. Аласапыран заманда тағ­дыр тоғыстырған ұлт өкілдерін қазақ жері бір отбасының бала­сын­дай бауырына басты. Біз ел басына түскен зұлмат жылдардың зілдей салмағын жан жүрегімізбен сезініп, бөлістік. Сондықтан біз адамзат баласына орны толмас қайғы-қасірет әкелген сұм соғыс­тың жер бетінде енді қайта­лан­бауын тілейміз. Сөзінің соңында Елбасы Ресей басшылығының шақыруымен Мәс­кеудегі Жеңіс парадына қаты­са­тынын айта келе: “Парадқа көп­теген ел­дер­дің мемлекет басшы­лары қатысады. Сондықтан да ма­мырдың 9-ы күні сіздермен бірге бола алмаймын. Оған ғафу өтіне­мін”, деді. Мемлекет басшысының ай­ту­ынша, 356 адам наградаға лайық­ты деп танылған. Анар ТӨЛЕУХАНҚЫЗЫ.