Алты миллион алау раушан

  Заман дидарындағы өзгерістер өмірге жаңа леп, ұтқыр ұмтылыстар ала келетіні бар. Анау бір жылдар­дағы қиындықтардан кейін Степно­гор ЖЭО-ға жаңа инвестор келген. Арада үш жыл өткенде бүкіл аймақты буға бөлеп тұратын үйреншікті көрініс ақырындап сейіле бастады. Сөйтсек, ілкімді азаматтар бей-берекет будаланып жататын будың өзін іске жарататын амал тапқан екен. Қаланың өндірістік аймағында осылайша «Құнарлы» гүл өсіру жылыжай орталығы пайда болды. Бұл – 2006 жыл еді. Кешен басшысы Тамара Ілия­со­ва өндіріс үш кезеңдік даму бағы­тын ұстанатынын айтады. Қазір 3 гектарды алып жатқан жылыжай Голландияның «Agrotech-Didam» компаниясының озық технологиясына негізделген жабдықтарды пайдаланады. Мұнда жыл сайын жоғары сұрыпты 6 миллион дана раушан (роза) өсіріліп, жұртшылықтың көңіл қуанышына айналуда. Енді екінші кезеңде жылыжай аумағы 6 гектарға ұлғайтылып, болашақта 12 гектарға жеткізілмек. Жыл бойы үздіксіз жұмыс істей­тін кәсіпорын өнімдеріне сұраныс жоғары. Қазір Степногор гүлдерін еліміздің барлық ірі қалалары мен Ресейдің шектес облыстары пайдаланады. Аналар күніне арналған шоқ-шоқ гүлдерді жылыжай қызметкерлері сұранысқа қарай жіберіп жатыр. Бұл олардың мерекеге тартуы деп білеміз. Бақберген АМАЛБЕК, «Егемен Қазақстан». Ақмола облысы. Суретте: «Құнарлы» кеше­ні­нің көңіл жадыратар раушандары.