Оңтүстікте жаңа екі өндіріс ашылды

Оңтүстік Қазақстан облысының Сайрам ауданында сүт-ет және кондитер өнімдерін шығаратын әрі помидор өсіруге арналған жылыжай кешені пайдалануға берілді. Бұл туралы облыс әкімінің баспасөз қызметі хабарлады. Үдемелі индустриялық-инновациялық даму бағдарламасы шеңберінде іске қосылған алғашқы кәсіпорында жылына 100 тонна сүт өнімдері және 100 тонна кондитер бұйымдары, сондай-ақ 700 тонна ет өнімдері шығарылады. Ал аумағы 2 гектар болатын жылыжай кешенінен жылына 1200 тонна помидор алу жоспарланып отыр. Қазір бұл жерде ауыл тұрғындары еңбек етуде. Оңтүстік Қазақстан облысының көкөніс өнімдерін республика жұртшылығы тұтынатыны белгілі. Соған қарамастан, жергілікті жерде азық-түлік қауіпсіздігін қамтамасыз етуге бағытталған жұмыстар өз нәтижесін беруде. Әмірхан Алмағанбетов. Дереккөз: Оңтүстік Қазақстан облысы әкімдігінің баспасөз қызметі. Фото: Оңтүстік Қазақстан облысы әкімдігінің баспасөз қызметі.