Балқаш көлінен заңсыз 1,5 тонна балық ауланды

Балқаш көлінен заңсыз 1,5 тонна балық аулаған азамат құқық қорғау қызметкерлерінің қолына түсті. Бұл туралы «24 kz» хабарлады. Аталған көлдегі балық қорын көбейту мәселесіне байланысты жыл бойына осы жерден балық аулауға тыйым салынған-ды. Бір таңқаларлығы, ұсталған күдіктінің жеке басын анықтайтын құжаты да болмай шықты. «Жедел іздестіру шарасы кезінде Балқаш көлінен заңсыз 1,5 тонна балық аулаған азамат ұсталды. Одан тәркіленген барлық айғақ заттар зертханаға жіберілді. Қазір күдіктіге қатысты тергеу амалдары жүргізілуде», - дейді Қарағанды облыстық ішкі істер департаменті табиғатты қорғау полициясы бөлімінің басшысы Болат Тақышев. Өткен жылы Қоршаған ортаны қорғау министрінің кеңесшісі Айнұр Қуатова Балқаш көліне байланысты мынадай мәлімдеме жасаған болатын: «Халықаралық сарапшылардың болжамына жүгінсек, бізбен іргелес Қытай­дың суға деген жыл сайынғы сұранысы 2030 жылға қарай қазіргі күнгі 555 млрд.текше метрден 818 млрд.текше метрге дейін өсетінін зерттеуші мамандар болжап бер­ді. Ал мұның өзі Балқаш көлін 80 пайыз сумен қамтып отырған Іле өзені суының көлемі де анағұрлым азаятындығын аң­ғартады. Мұндай үрей­лі бол­жам Бал­қаш мәселесін мемлекетаралық деңгей­де шешуді талап етеді». Міне, осыдан кейін мұндағы балық қорын көбейту ісі болашақта өте күрделі болатыны аңғарылып тұр. Сондықтан табиғат жанашырлары көлдегі байлықты қорғауға жұмылуда... Әмірхан Алмағанбетов. Дереккөз: «24 kz». Фото: «24 kz».