Аймақтар • 29 Желтоқсан, 2021

«Еркін күшке» газ келіп, «Есет батырда» амбулатория ашылды

54 рет көрсетілді

Алға ауданы Тамды ауылдық округіне қарасты «Еркін күш» ауылына газ құбыры тартылды. Бұл Ақтөбе облысы бойынша биылдыққа көгілдір отын жеткізілген он бесінші ауыл. Биылғы жылдың басынан бері 8 мыңға жуық тұрғыны бар 14 елді мекенге газ құбыры жеткізіліп, ауыл тұрғындарының бейнеті азайғанын айта кеткен жөн. Осылайша, Ақтөбе облысы тұрғындарының 92,5%-ы көгілдір отынмен қамтылып, газдандыру көрсеткіші бойынша өңір елімізде бесінші орынға көтерілді. Ал Nur Otan партиясының Жол картасында 2025 жылға дейін облыстың 104 елді мекенін газбен қамту жоспарланған.

«Бас мердігер «Теплоэнер­гострой» ЖШС Тамдыдан «Ер­кін күшке» қарай құбыр тар­тып, жұмысты екі ай шама­сында аяқтады. Бұл жобаға облыс­тық бюджеттен 50 млн теңге жұм­сал­ды. Бүгінде Алға ауданы тұр­ғын­дарының 98,3 %-ы кө­гіл­дір отын­ға қол жеткізді. Газ құ­быры өт­кі­зілгеннен кейін «Еркін күшке» көшіп келушілер көбейетін түрі бар. Бұл ауыл Ақтөбе қаласынан 50 шақырым жерде, «Ақтөбе-Аты­рау» тас­жолы­ның бойында орна­ласқан. 500 тұрғыны, бастауыш мектебі бар. Ауыл ішінде 2 шақырым таратушы желілері жүргізілді. Келесі жылы көршілес Талдысай ауылына да газ келмек. Оған облыстық бюджеттен 70 млн бөлінді. Сонда Алға ауданы бо­йынша көгілдір отын жеткізілме­ген жалғыз ауыл – Жерұйық елді мекені ғана қалды. Үшқұдық ауылдық округінің Жер­ұйық ауылында 250 адам тұ­рады. Осы ауылға көгілдір отын жет­кізудің жобалық-сметалық құжаттарын әзірлеп қойдық», дейді Алға ауданының әкімі Нұрбол Ержанов.

Ақтөбе облысында газданды­ру жобалары «Ауыл – ел бесігі» жо­басы бойынша қаржыландыры­лу­да. Облыстық энергетика және тұр­ғын үй-коммуналдық шаруа­шы­лық басқармасының басшысы Ержан Мұз­дыбаевтың айтуын­ша, «Жерұйық» жобасы мерзімінде аяқталса, онда Алға ауданы облыстағы барлық елді мекендері газдандырылған ең бірінші аудан болады. Одан кейінгі кезекте Хромтау ауданы тұр. Хромтау ауданының Құдықсай елді мекеніне газ құбырын жүргізу алдағы сәуірде басталмақ.

«Еркін күш» ауылындағы газ құбырының берілу рәсіміне қа­тысқан өңір басшысы Оңдасын Оразалинге Алға ауданының Құр­­метті азаматы, жасы 80-нен ас­қан әже, алты баланың анасы Талан Ескелдина бірнеше көше­нің жарықтандырылып, ауыл­дық округ орталығы Тамды елді меке­нінің көшелеріне асфальт төсеу жұмыс­тары қарқынды жүргізіліп жат­қа­нына ризашылығын білдір­ді. «Біздің ауылдың адамдары ең­бек­қор. Әр үйдің ауласында өз құдығы бар, жұрт мал бағып, егін егіп, бау-бақша өсіреді. Жаз бойы тракторы бар адамдар шөп шауып, жан-жаққа апарып сатады. Бұл өзін-өзі асырап отырған ауыл», дейді ол.

Ауыл тұрғыны Альбина Оңғар өз отбасының көмір мен ағаш сатып алуға жыл сайын 200 мың теңге жұмсайтынын, ендігі жерде газдың төлемі көмір жағуға қа­рағанда арзанға түсетінін әрі от жағу мен күл шығару бейнетінен құтылатынына риза.

Осы сапарымызда Алға ауданы Бесқоспа ауылдық округіне қарасты Есет батыр ауылындағы медициналық амбулаторияның ашылу рәсіміне қатыстық. «Ауыл – ел бесігі» бағдарламасы шеңберін­де жергілікті бюджеттен 121 млн ­тең­геге қаржыландырылып, бас-аяғы 4 айдың ішінде салынған ме­ди­цина мекемесі. Алға аудандық ауру­ханасының бас дәрігері Қанат Медеубаев амбулаторияға бір дә­рігер, төрт медбике штаты бекі­тіл­генін айтты. Ендігі жерде ауыл жұрты кез келген дәрігерлік көмек үшін аудан орталығына шап­қы­ла­майды. Алғадағы аудан­дық ауру­хананың тіс дәрігері апта­сына бір рет осында келіп жұрт­қа қа­был­дау жүргізеді. Құры­лыс жүр­гізген мердігер емдеу мекемесін  жи­һаз­дармен, меди­ци­налық құрал-жаб­дық­тармен толық жабдықтаған. Осылайша, 2 мың тұрғыны бар Есет батыр ауылы тұрғындары Жаңа жыл қарсаңында жаңа медицина­лық мекеменің жұмысын бастаға­ны­на риза.

 

Ақтөбе облысы,

Алға ауданы

Соңғы жаңалықтар

Ұқсас жаңалықтар